Duha nga namaligya og tambal gipangsignit

Duha ka lalake ang nangasikop sa mga sakop sa Talamban Police Station sa dihang yano kining namaligya’g tambal nga nagkinahanglan og prescription sa mga doctor diha sa mga sari-sari store sa sitio Center barangay Bacayan, siyudad sa Sugbo.

Ang pagsikop napahigayon sa alas 10:30 sa buntag niadtong Lunes, Abril 13, 2020.

Ang mga nangadakpan mao sila si Ruel Nunez, 20, nga lumad nga taga Barangay San Isidro, lungsod sa Cataingan, probinsya sa Masbate, apan kasamtangan nga nagpuyo sa barangay San Jose, dakbayan sa Sugbo, ug James Bulat, 22, nga taga Purok 3, barangay San Jose.

Matod ni Police Captain Jonathan Bethooven Taneo, hepe sa Talamban Police Station, nga na agi-an sa iyang sakop ang duha nga namaligya’g nga antibiotics ug mga tambal alang sa high blood nga kinahanglan og prescription sa doctor. Ubos sa balaod, ang pharmacy lang ang gitugotan nga makabaligya niini.

Sa dihang gipangitaan silag lisensya sa pagbaligyag tambal wala kini ikapakita nga maoy hinungdan nga gidiretso sila sa pagdakop.

Nakuha sa mga suspetsado ang mga tambal nga antibiotic sama sa Cotrimoxazole (Kathrex); Cefalexin (Monohydrate); Amoxicillin; ug prescription drugs nga mao ang Carbocisteine;

Losartan Potassium; Prednisone; Salbutamol (ventrix), Dicycloverine (Gasaide).

Lakip sa nasakmit ang over the counter nga tambal nga mao ang Mefinamic Acids (Mecid) (Megyxan) ug (Pontein); Paracetamol (Biogesics); Alaxan FR; Ibufrofen; Neozep forte ug Bio Flu; Flugard.

“Chance upon lang ni, na agian sa atong tropa nya nahibulong sila nga ang gibaligyaan sa katong duha is sari-sari store ra, nya pag tan-aw sa tambal mga antibiotics man mga prescriptive drugs man. So dili man na nimo pwede ibaligya sa sari-sari store sa pharmacy raman gyud na sir,” pasabot ni Taneo.

Laing kalapasan nga nahimo sa duha mao ang pagsupak sa Executive Order nga nga dili sa mga tawo nga manggawas sa ilang panimay tungod sa enhanced community quarantine apan ang duha daw sa walay nahitabo sa palibot.

Ang duha nabalhog sa Talamban Police Station ug mag atubang og kaso nunot sa kalapasan sa Executive Order 64 ni Mayor Edgardo Labella ug kalapasan sa section 30 sa Republic Act 10918 kun Philippine Pharmacy Act.