ECQ pahugtan pa unta

Gipatuman na man unta ang enhanced community quarantine (ECQ), apan daghan na man hinuon ang mga tawo nga nanggawas sa ilang mga balay, way pagpakabana sa ilang kaluwasan gikan sa novel coronavirus, kagaw nga nagdala sa coronavirus disease (Covid-19) nga grabe ka mananakod. Makita sa social media posts ang paghuot sa trapiko sa dagkong mga dan sa Dakbayan sa Sugbo. Kahibulongan nga talan-awon ang pagbaha sa pribadong mga sakyanan sa dan taliwa sa pagpatuman sa ECQ. Mao gani ni ang nag-aghat kang Cebu City police officer-in-charge Colonel Josefino Ligan sa pagmontar og mga checkpoint niadtong Martes sa kadalanan. Moabot og 190 ka mga tawo ang ilang nadakpan.

Duna pay mga naglaroylaroy nga wa magsul-ob og face mask. Mga establisemento ug tapok sa mga tawo nga wa mag-obserbar sa social distancing.

Klaro nga ang quarantine pass gigamit sa pag-abuso, pinaagi sa pagdala niini bisan asa aron lang makasuroy ug pagdawat na sa mga trabahante sa cash aid gikan sa kagamhanan.

Pun-an pa aning mga tawo nga exempted sa quarantine nga nag-abuso usab sa ilang prebilihiyo.

Tungod sa kakuyaw sa Covid-19, kansang mga kaso sa Dakbayan sa Sugbo taas kaayo itandi sa ubang mga dapit dinhi, gikinahanglan ang higpit nga pagpatuman sa ECQ.

Kon di mohimo og hugot nga lakang si Cebu City Mayor Edgardo Labella nga magpugong sa mga tawo sa pagpanggawas nga sama ra og normal ang sitwasyon, kining mga kaso karon sa Covid-19 seguradong mapun-an pa.

Gikinahanglan usab sa mga barangay official ug kapulisan nga mopahugot sa pagpatuman sa ECQ sa ilang tagsa ka jurisdiction.

Ang sityo Zapatera sa Barangay Luz nga usa ka adlaw, nahigmata nga daghan diay kanila ang positibo sa kagaw, maoy dako nga ehemplo nga ang pagpabaya, pagkamapasagaron ug kuwang sa pagpakabana kuyaw diay kaayo. Sama ra nga kita ang nagpatay sa atong kaugalingon.