Martial law?

Kon magtan-aw kita sa Army trucks ug armored personnel carriers (APC) nga nagsauysaoy sa Dakbayan, makatuaw kita sa pag-ingon nga martial law na ba? Limitado na ang atong paglihok ug daghang presensiya sa mga militar, manombalik sa atong panumdoman ang diktadoriya ni anhing Pres. Ferdinand Marcos.

Sa mga batan-on o millennials, ang atong kahimtang karon mas grabe pa sa martial law. Way lockdown ug social distancing panahon sa diktadoriya. Normal nga kalihokan nagpadayon.

Pero lahi ang hinungdan karon. Dili tungod sa pulitika ug kahakog sa gahom ug bahandi. Tungod sa Enhanced Community Quarantine (ECQ) sa pagpakigbatok sa kontra nga dili makita. Kalibotanong pandemic kini sa coronavirus disease 2019 (Covid-19).

Si Presidente Rodrigo Duterte nagpakabana ug nimando sa ECQ nga walay bisan gamayng bulok sa pulitika. Apan nag-unsa kining nagsauysaoy nga Army trucks ug APCs? Nag-usik-usik lang og gasolina ug panahon sa mga personnel?

Ug sumala sa Central Command sa Armed Forces of the Philippines (CentCom-AFP) sa Lahug, dakbayan sa Sugbo, kini nagpasabot sa pagpadala sa "strong message to the Cebuanos to stay at home."

Si Capt. Eduardo Precioso Jr., hepe sa Public Information Office sa CentCom, niingon nga nitubag lang sila sa panawagan sa mga opisyal sama ni Gov. Gwendolyn Garcia ug ubang mayor.

Kon mao, subra kaayo o overacting. Gawas nga laing usik sa gasto gikan sa panudlanan sa kagamhanan. Maayong stay-at-camp sab kamo. Ang external aggressor dili makita - virus, dili tawo.

Maayo pa og magdaginot kamo sa operational expenses aron ang subra ikatampo sa pundo sa administrasyon sa pagsumpo sa Covid-19. Kon gusto mopadala og strong message, pwede i-text na lang? Segurado nga ang telecommunications companies mohatag og libreng serbisyo.