VEHICLE PASSES GIKANSELAR NI GWEN
Gibakwi ni Gobernador Gwendolyn Garcia ang mga
transit vehicle passes nga na issue nga "valid indefinitely".
Mao kini ang gipahibawo ni Garcia sa mga tigbalita sa Abril 18, 2020.
Kini ang paagi ni Garcia nga mapatuman ang mas estrikto nga border control sa lalawigan aron malikayan usab nga makalusot ang wala na nalakip sa exemption sa enhanced community quarantine (ECQ) sa Probinsya.
Tungod niini, kinahanglan nga mo-apply pag usab ang tanan nga naisyuhan sa pass.
Ang transit vehicle pass maoy ipakita sa kapulisan aron makalusot sa borders sa mga lungsod.
Subay sa kamandoan ni Garcia, ang tanan nga sakyanan, delivery trucks ug transit vans kuhaan og pass sa Kagamhanan sa lalawigan sa Sugbo o sa lokal nga kagamhanan.
Ang bag-ong anunsyo ni Garcia naumol human sa nadawat nga taho sa gobernador labot sa reklamo ni Mayor Sun Shimura sa Daanbantayan. Kini kabahin sa sakyanan nga nakalusot sa lungsod, apan peke ang gipakita sa drayber nga transit vehicle pass.
Sakay sa sakyanan mao ang giingong mga empleyado sa usa ka business process outsourcing (BPO) company sa Dakbayan sa Sugbo.
"Nag gamit kuno ug transit vehicle pass. Nagpakita kuno og certification ang Qualfon nga pwede daw sila manguli", matod ni Garcia.
May hulagway nga gipakita si Garcia nga maoy giingong identification (ID) card nga gipresentar sa driver atol sa checkpoint.
Gitandi niya ang issued ID sa Kapitolyo nga may gi printa nga control number.
May identification usab kini kon asa nga distrito nahisakop ang tag-iya sa ID.
Sa pagsuwat niining balita, padayon nga gipa pangita ni Garcia sa kapulisan, ang tawo nga mipakita sa peke nga ID.
"Kani si Edwin Yu Tindugan Jr., Ako na giingnan nga palihog pangitaa kay obviously fake man ni,"matod ni Garcia.
Subay sa maong balita, miluwat og kamandoan si Garcia sa kapulisan lakip na ang kadagkoan sa mga lungsod sa probinsya nga estriktong susihon ang tanan nga mga sakyanan nga moagi sa checkpoint ug borders sa probinsya. Kini sama sa delivery vans, cargo trucks bisan pa man ambulansya ug uban pa nga mga sakyanan.
Ang maong lakang, pag siguro nga wala na'y makalusot nga tawo nga wala nalakip sa exemption ubos sa Executive Order (EO) 5-Q.
Kinahanglan nga mo pakita og ID ang anaa sa sakyanan aron pagsiguro nga exempted kini. Samtang sa tanan nga delivery trucks, duha lang ang mahimong mosakay, ang driver ug
truckboy. Kon mosobra, pakanaugon ug di palutson.