P1 BILLION BATOK COVID

GAHIN SA CEBU CITY ALANG SA MGA HINABANG, TUKOD OG PASILIDAD SA QUARANTINE

Ang Siyudad sa Sugbo dunay P1 billion nga budget aron pagtubag sa mga panginahanglan niini pagkombate sa coronavirus disease (Covid-19).

Ang pundo mao karon ang gikuhaan alang sa mga hinabang sa mga residente nga naapektuhan sa gipatuman nga enhanced community quarantine (ECQ), pagtukod og pasilidad nga himuon nga quarantine area sa mga positibo sa Covid ingon man mga ekipo nga manalipod sa mga frontliner ug uban pa.

Ang P500 million maoy gigahin alang sa mga hinabang sa mga lumolupyo.

Matod ni Assistant Secretary Jonji Gonzales sa Office of the Presidential Assistant for the

Visayas nga ang Siyudad sa Sugbo dunay gahin nga P1 billion sa gubat batok sa pandemic, dugang sa quick response funds, kapabilidad sa paghimo og mass testing ug pagtukod og mga pasilidad sa quarantine.

Usa sa quarantine facility naa padayong gitrabaho sa North Reclamation Area.

“Sila man ay nagkaroon ngayon ng exponential growth from 2 to 5 to 21 to 24 in the last four days, pero sila ang pinaka-handa sa battle na ito,” matod ni Gonzales sa late-night #LagingHandaPH briefing sa Biyernes, Abril 17.

Sa Biyernes, Abril 17, ang mga kaso sa Covid sa Siyudad nisulbong ngadto sa 161, diin 84 sa mao nga adlaw napalgan ang bag-ong mga kaso sa massive tests.

Sa Sabado, Abril 18, laing duha ka mga kaso ang nadugang.

Ang labing daghan naa sa sityo Zapatera, Barangay Luz, Dakbayan sa Sugbo.

Ang barangay gipailawom sa total lockdown niadtong Biyernes, Abril 17.

Si Gonzales niingon nga ang Cebu City nidonar og 30,000 ka swab test kits ug 32,500 ka test kits sa Vicente Sotto Memorial Medical Center (VSMMC), usa ka certified laboratory nga dunay kapabilidad sa pag-test sa novel coronavirus, nagdala sa sakit nga Covid.

Duna pay laing machines nga gidonar ang Siyudad sa Sugbo sa ospital.

Ang Kagamhanan sa Dakbayan nagpadali usab sa pagpatukod sa quarantine facility nga dunay 200-bed capacity sa NRA. Ang P1 billion budget gipasar sa konseho niadtong Marso 20, 2020.

Gawas sa mga hinabang, pasilidad, mga gamit ug uban pa, gigahinan usab niini ang pagkuha og dugang mga doktor ug nars.

/ ALAN TANGCAWAN ■ ROVING: Maorag dunay tinud-anay nga gubat sa Metro Cebu tungod nianing mga sundawo nga sakay sa armored personnel carrier (APC) ug truck nga miagi sa Punta Rizal sa Dakbayan sa Lapu-Lapu sa wa pa mopatrolya sa Dakbayan sa Mandaue ug Cebu City. Ang mga sundawo tipik sa pagpalig-on sa seguridad samtang nagsaka ang mga kaso sa coronavirus disease (Covid-19) ug pagpahugot pa sa pagpatuman sa enhanced community quarantine (ECQ).