Di tinuod dunay nangeskapo sa Zapatera

Gihimakak ni Cebu City Police Office (CCPO) Chief Police Colonel Josefino Ligan nga adunay mga lumolupyo sa sitio Zapatera barangay Luz nga nanglayas pinaagi sa pag ambak sa paril tungod sa kaAron hadlok nga matakdan sa coronavirus disease (Covid-19).

Matod ni Ligan nga wal siya makadawat sa maong impormasyon ug way kamatuoran tungod kay hugot nga gibantayan sa iyang mga sakop ang sitio sukad gi deklara ang lockdown.

“Wala man. Dili na tinuod. Dili na gyud na sila makagawas diha. Wala mi report nga nadawat nga naay nilayas,” pag klaro ni Ligan.

Kapin na sa 100 ang positibo sa Covid19 sa sitio Zapatera hinungdan nga gi-lockdown ang tibuok Barangay Luz.

GI-MONITOR

Dunay duha ka mga tawo nga miabot sa Sityo Kaimito, Barangay Sapangdaku, Siyudad sa Sugbo nga gikan sa Barangay Luz.

Ang duha nga giisip nga persons under monitoring (PUM), di gikan sa sityo Zapatera, ang epicenter sa mga kaso sa Covid sa barangay.

Si Police Captain Janelito Marquez, hepe sa Guadalupe Police Station nga nahinabi sa Superbalita Cebu, niingon nga sila gjpahibawo niini sa barangay.

Ilang girespondihan ang taho nga dunay nanglayas gikan sa sityo Zapatera, apan ilang nasuta nga di tinuod. Nag-abang lang ang duha sa us aka balay daplin sa karsada sa Barangay Luz.

"Daghan man gud ang nang gawas nga di mao nga estorya sa mga tao mao na nga atong iklaro nila nga dili ni gikan sa Sityo Zapatera. Gani dinha ra ni sila nag-abang og balay duol lang sa dalan," pag tin-aw ni Marquez.

Ang duha gitugtan sa pagpuyo sa balay sa ilang paryenteng barangay konsehal, apan giisip silang mga PUM, nagpasabot nga ipaubos sila sa 14 ka adlaw nga quarantine.