Lahi sa siyudad og probinsiya
Ang problema sa pagdagsa sa katawhan gawas sa ilang mga panimalay bisan ubos kita sa enhanced community quarantine (ECQ) wala lang masinati dinhi sa dakbayan. Bisan ang mga dagkong siyudad sa kaulohan nakasinati gihapon ning maong problema. Kini gumikan kay daghan man ang mga tawo sa mga urban areas.
Usa sa mga rason niini gumikan kay managlahi man ang kahimtang ug situwasyon sa mga lumolupyo dinhi sa dakbayan kay sa didto sa probinsiya. Ang mga tawo dinhi sa siyudad nagsalig sa ilang panginabuhi-an ug sa matang sa ilang trabaho mao nga manggawas gyud sila. Unya kuwang usab sa disiplina. Gahi og ulo ang mga tawo dinhi kon itandi sa probinsiya.
Didto sa probinsiya, kasagaran sa mga tawo nabuhi sa ilang kaugalingong paningkamot pinaagi sa pagtikad sa ilang kaugalingong yuta. Wala manarbaho sa mga pribadong kompaniya. Busa dili na mogawas ug mangita og panginabuhian kay puwede ra man silang mosanggi sa ilang mga pananum.
Ang mga tawo sa probinsiya dali ra usab mahadlok. Mao nga motuman gyud sila sa balaod ug maminaw kon unsa ang mando sa ilang mga opisyal. Dinhi gud sa siyudad, nagkalain-laing klase ang mga tawo ug gahig mga ulo. Mao nang wala gyud kaayo kaso sa Covid 19 sa probinsiya kay disiplinado man ang mga tawo. Dili sama sa mga tawo dinhi sa siyudad, labi pa ang mga informal settlers, sama diha sa sitio Zapatera, Barangay Luz nga nagpunsisok ang mga lumolupyo hinungdan nga daghan ang natakbuyan.
BABOY ANG RASYON
Maayo ang nahuna-hunaan ni Tudela, Camotes Mayor Jojo Solante sa iyang paghatag og relief good sa iyang mga konstituwente. Kay samtang ang uban manghatag og bugas ug mga delata labi pa sardinas, si Mayor Solante, bugas ug karneng baboy ang iyang gipanghatag. Inay nga mopalit siyag sardinas, iyang giawhag ang iyang mga lomolopyo nga ibaligya ang ilang mga binuhing baboy ug ang munisipyo ang mopalit niini. Ipa-ihaw ni Mayor Solante ug maoy ipanghatag sa katawhan. Di ba maayo? Morag pista, humba ug adobo maoy ipakaon.