Sitio Zapatera gi-Covid
Sa tanang mga dapit sa urban poor, kining Sitio Zapatera sa Barrio Luz maoy nahimong sentro karon sa coronavirus disease tungod sa grabing pagsaka sa natakdan sa maong dapit.
Mao ang akong gikahadlokan sa miaging mga semana nga dunay makalusot lang nga positive diha sa mga urban poor area, humantikaan ta ini.
Di na ko suweto sa maong dapit kay wala na ko makabalik sulod sa pipila ka mga tuig. Apan ikapila ka higayon ko nga nakasulod dinhi sugod pa kaniadtong tinun-an pa ko. Naa baya dinhi nagpuyo ang mga lig-ong lider namo sa una sa Panaghugpong ug Nagkahiusang Sugbo Alang sa Demokrasya (Nasud).
Makahinumdom pa ko kaniadtong nitambong ko og mga tigum isip tipik sa mga preparasyon og usa ka welgang bayan. Lalim bay, di mi moagi og mga agi-anan. Anha mi mosulod og balay unya molusot sa mga bintana. Haha!
Sulod sa katuigan dihang nahimo kong sakop sa media dinhi sa Sugbo, naa sab gyuy mga higayon nga moanha ta sa maong dapit aron mobisita sa atong mga karaang kaila.
Tungod niini, makaingon ko nga duna sab kitay ideya kon unsa ka huot ang mga kabalayan ug unsa ka daghan ang namuyo sa mga balay sa maong dapit.
Mao nga maglisod ko og hunahuna kon unsaon kaha ang quarantine ug social distancing sa maong dapit. Gani, daghan diha nga kon magpunsisok tanan sa ilang sala-sala sa balay, mapuno gyud ang mga suok sa paglingkod nilang tanan.
Mosurop ang akong dugo nga mobasa sa mga hilas nga magsigig pamalikas nga badlungon daw ang mga taga Sitio Zapatera.
Maayo kining mga way laing gibuhat nga naa lang nagyampungad sa Facebook nga naghigdahigda sa sofa. Apan hunahunaa gud ang unsa ka alimuot nga sala nga napunog tawo nga dunay usa lang ka electric fan. Dayon, walay Internet.
Unsaon nila pag-Internet nga sirado man ang mga Internet café diin malingaw unta ang mga bayong-bayong.
Ambot kon nganong tungod sa kabuang sa pipila, himuon na hinuong badlungon ang kapin sa 9 mil ka mga lumolupyo sa dapit.
Tinuod, duna gyuy badlungon nga napositibo nga nakig-inom sa iyang barkada. Ang amaw, nakahibawo baya sa iyang kahimtang nga dunay Covid 19.
Mao nga karon, daghan gyud hinuon ang mga nangapositibo.
Ang ako lang sab nga kining lockdown dunganan unta sa saktong information campaign aron makasabot ang mga residente sa nahitabo ug unsa angay nilang buhaton basi sa ilang kahimtang, mga pagkaon nga ihatod sa kabalayan, ug tabang kabahin sa unsa pang mga panginahanglan.
Di mahimong usbon sa Syudad sa Sugbo ang mga sipyat. Ang ako lang gyud nga gikinahanglan karon ang mga paspas ug tukmang mga lakang. Anhi makita ang katag sa atong crisis managers.
Total lockdown na sila. Naay mga pulis nag-guard, city health mo-monitor. Ang amo lang gyud, shameful kaayo kay ang mga tawo gahi kaayo’g ulo, ilabi na kana sitio-a, nya mao nay pinakadaku namo nga sitio. In fact population diha niabot gyud 10,000 ka individuals. Sige mi pahimangno, grabe na among pakiluoy, please stay-at-home. Mao na atong way para dili na mo-extend pa.”
- Luz Barangay Captain Ronilio Sab-a.