Ginoo, kaluy-i kami
Binasi sa Mga Buhat 2:42-47; Salmo 118; 1 Pedro 1:3-9; ug Juan 20:19-31
Gipahigayon ni San Juan Pablo II ang Solemnidad sa “Divine Mercy” sa ikaduhang Dominggo sa panahon sa Pasko sa Pagkabanhaw ni Cristo. Ug ang unang santo nga giila sa Simbahan sa bag-ong milenyo mao si Santa Faustina Kowalsa, ang instrumento sa pagpakuyanap sa debosyon sa Diosnong Kaluoy. Nakaagi ang maong Santo Papa sa makalilisang nga panahon sa kasaysayan sa tawo nga mao ang Ikaduhang Gubat sa Kalibutan diin milyonmilyon ang namatay tungod sa panagsangka sa ideyolohiya. Nakaamgo siya nga ang kaluoy sa Dios lamang maoy makabutang og utlanan sa pagkuyanap sa dautan sa kalibutan.
Lahi ang atong giatubang nga kadautan sa atong kasamtangang panahon. Ang Covid-19 dili makita ug nakigsangka kini sa tibuok kalibutan. Tungod sa atong mga bulohaton sa paglikay niini, nakaplagan nato ang atong lawas sa kinauyokang paagi. Sige lang ta og panghunaw. Mopahilayo kita sa uban. Ang kalimpiyo ug kapiskay sa lawas maoy atong gihatagan og pagtagad labaw sa tanan.
Lahi ang atong naabtan sa ebanghelyo. Gihuypan ni Jesus ang iyang mga tinun-an. Gipabutang niya ang tudlo ni Tomas, nga nagduda kon siya ba gayod nabanhaw, sa iyang samarang kamot ug kilid. Walay social distancing. Dili man god virus ang ilang kaatbang kondili kahadlok sa mga kadagkoan sa mga Judio. Ang gigikanan sa kahadlok mao ang kamatayon ug sala. Mao nga gipakita ni Jesus ang iyang pagkabanhawng presensya, nga maoy nibuntog sa kamatayon, ug gihatagan niya sila og gahum sa pagpasaylo sa sala.
Ang kaluoy sa Dios maoy mohatag og utlanan sa gahum sa sala. Kon paandayonan man god kining gahum sa sala mahingpit ang kalaglagan sa tawo ug pagkahanaw sa kalibutan.
Apan ang pagpasaylo sa sala sinugdanan lamang. Mabasa nato sa Mga Buhat sa mga Apostol nga ang mga gipasaylo nga gibunyagan nagkapundok isip Kristohanong katilingban nga tinudloan sa mga apostol, nagpikaspikas og pan nga mao ang Santos nga Misa, ug nag-ampo. Nag-inambitay sila sa ilang mga kabtangan ug gibahinbahin kini segun sa panginahanglan. Nagsalohay sila nga puno sa kalipay. Ang Kristohanong katilingban diay gikinahanglan sa panaw sa pagkatibuok diha sa bag-ong kinabuhi nga nadawat nato sa dihang gipasaylo atong mga sala.
May gidugang pa si Pedro. Sumala niya kining bag-ong kinabuhi ngadto sa buhing paglaum mag-agi gyod og pagsubo ug pagsulay aron makita kon “tinuod ba gayod ang inyong pagtuo, kay bisan gani ang bulawan nga lumalabay lamang sulayan man pinaagi sa kalayo”.
Daghan ang nakaplagan nga “positive” sa Sitio Zapatera sa Barrio Luz. Magpadayon kita og pagpakiluoy sa atong Ginoo karong Domingo sa “Divine Mercy”. Magpadayon pod ta og pagtinabangay isip Kristohanong katilingban sa maong barangay ug sa maong parokya, ug sa tibuok Dakbayan sa Sugbo.
Ginoo kaluy-i kami!