Agwantahon nato
Niadtong Dominggo, samtang nagpadung ko mamalit og supplies, nangita og lechon baboy, naa koy nakit-an nga pipila ka mountain biker nga nanikad, apan nagsul-ob og face mask. Nahimuot kong naghuna-huna nga bisan sa hulga sa novel coronavirus, naa gihapoy mga siklista nga nanuroy sa kadalanan.
Basin wa na sila makaagwanta sa kamingaw. Alang nako, kanang Dominggo, ihatag na lang unta sa gobyerno sa mga tawo nga magbiseklita sa kabukiran kay di bitaw na magdug-ol. Naa na pirme ang social distancing kay kuyaw baya sa disgrasya ang magsikit.
Wa ko masayop sa akong pagtuo nga sa mga krisis ug katalagman, bentaha ang dunay biseklita. Sa amoa lang gani, gamit kaayo sa akong manghod ug akong anak nga babaye ang among mountain bike kay maoy ilang dali nga masakyan kon dunay lakaw, sama sa pagbayad agi sa banko ug pag-withdraw.
FAKE NEWS
Daghan kaayo rong nanggawas nga fake news sa social media. Sama anang ipatuman kuno karong Lunes ang lockdown sa Dakbayan sa Sugbo. Sa pagkakaron, di pa man na tinuod. Wa maghisgot niani si Mayor Edgardo Labella sa iyang mga press conference. Ang iyang gihisgutan nga possible, apan di pa niya ni buhaton. Ang iya rang gi lockdown ang Barangay Luz nga taas na kaayo og mga kaso sa coronavirus disease.
Di pa usab tinuod nga duna nay color coding sa mga sakyanan nga pagawason ug padaganon sa mga karsada. Magtagbo pa ang Siyudad ug Land Transportation Office (LTO) aron kini hisgutan karong Lunes.
Nahuna-hunaan ning ingon niani tungod kay nanaghan ang mga sakyanan sa karsada, nga susama na hinuon og way Covid.
MADUGAY
Kon padayong magsaka ang gidaghanon sa mga kaso sa Covid sa Sugbo, seguradong madugay pa ang paglibkas sa enhanced community quarantine (ECQ). Unsaon paglibas kon magpabilin pang dako ang hulga sa komunidad.
Pipila ra ka paagi nga malikayan ang pagtakod. Maglikay sa paggawas sa balay. Limitahan ang paglibotlibot. Naa kanunay ang social distancing ug magsul-ob og protective gear kon mogawas.
Unya kanunay manghunaw ug magbutang og alcohol kon mohikap og mga surface nga di ka segurado nga contaminated o di. Matag human og kupot og sa kwarta, manghugas. Atoa ning sundon aro makabalik na ta sa atong naandan. Aron ta makasikad og balik sa bukid.