Suweldo sa NBA players gikibhangan
Nagkanayon si National Basketball Association (NBA) Commissioner Adam Silver nga imposible gihapon ning puntoha nga mobuhi og desisyon ang liga nga ibalik na ang mga duwa niini.
Ang klaro lang nga senaryo: dili na i-eskedyul og balik sa NBA ang nahabiling 259 ka mga duwa sa regular season nga nangasuspenso gumikan sa hulga sa coronavirus disease (Covid-19).
Matod ni Silver nga tungod niini, kibhangan og 25% ang sweldo sa tanang mga magduduwa sugod karong Mayo 15.
Human sa regular nga panaghugpong sa board of governors nga gipaagi sa video conference tungod sa Covid-19, asoy ni Silver nga natuki ang tanang mga opsyon aron ipadayon ang kompetisyon ug makadeklarar og kampiyon sa 2019-20 season.
“I think there is a sense that we can continue to take the leading role as we learn more in coming up with an appropriate regimen and protocol for returning to business,” pasabot ni Silver. “There’s a recognition from (owners) that this is bigger than our business; certainly, bigger than sports.”
Ang desisyon kabahin sa pagkibhang sa suweldo sa mga magduduwa giuyonan sa National Basketball Players Association.
Matod sa liga nga padayon ang inanay nga pagkibhang sa suweldo kon hingpit nga makanselar ang season.
Hinuon gitataw ni Silver nga buhaton nila ang tanan aron masalbar ang season.
“All these team owners are in this business because they love the game,” asoy ni Silver.
“They love the competition, and I know from my conversations with players they feel the same way. But when you’re dealing with human life, that trumps anything else we could possibly talk about. That’s really where the conversation began and ended today.”
Ang NBA nakig-alayon ni Disney chairman Bob Iger ug hasta ni Dr. David Ho sa Columbia University kabahin sa dagan sa Covid-19 aron aduna sila'y ideya kon unsa ang angayan nilang buhaton.
“To steal a line from Bob, when he was asked by several people about particular timelines, he said from his standpoint ‘it’s about the data, and not the date,’” pasabot ni Silver.
Kon wala pa nahunong ang mga duwa, magsugod na unta karong adlaw a (RP time) ang playoffs. Gibanabanang moabot sa $800 million ang makibhang gikan sa suweldo sa tanang mga magduduwa.
Gitino ni Silver nga kon sa ilang tan-aw puwede nang ibalik ang mga duwa, hayan ilaha dayon kining buhaton aron maminusan ang kibhang sa suweldo sa mga magduduwa.
“All rules are off at this point during the situation we find ourselves in and the country is in,” matod ni Silver. “If there is an opportunity to resume play, even if it looks different than what we’ve done historically, we should be modeling it."
Ang NBA padayon sab sa pagpaminaw og mga suhestiyon kon unsay angayan nilang buhaton kabahin sa pagsalbar sa season.
Adunay posibilidad nga ibalik sa NBA ang ilang mga duwa apan dili kini patan-awan og mga tawo aron paglikay nga mas mokatap ang Covid-19.
Lakip sa mga lugar nga planong pahigayunan og mga duwa sa NBA mao ang Las Vegas, Los Angeles ug Disney complex duol sa Orlando.