TOTOY SA TINDERA GIKUMOT

LANGYAW NASUKO WA BALIGYAI OG BEER TUNGOD SA LIQUOR BAN SA ECQ

Gikumotkumot ang totoy sa tindera sa langyaw nga nasuko nga wa baligyai og beer tungod sa liquor ban sa Enhanced Community Quarantine (ECQ) taliwa ning pandemic sa Coronavirus disease 2019 (Covid-19).

Naigking ang tindera (ngan gipugngan) dihang gisagpo ang iyang dughan ni Stian Nordas, 31, Norwegian national, dunay kapuyo nga Pinay ug kasamtangang nagpuyo sa Barangay Bagay, lungsod sa Daanbantayan, Sugbo.

Ang langyaw daling giposasan sa kapulisan nga nitubag sa alarma sa nahitabo sa usa ka tindahan sulod sa merkado publiko sa Barangay Poblacion sa naasoy nga lungsod niadtong Sabado, Abril 18, alas 3:30 sa hapon.

Ang biktima usa ka 24-anyos nga taga Sitio Libertad, Barangay Bagay, Daanbantayan.

Si Police Captain Ian Macatangay, hepe sa Daanbantayan Police Station nga nahinabi sa Superbalita Cebu, nagkanayon nga ang biktima personal nga mi-report sa ilang buhatan human nagbinastos ang suspek.

Ang suspek gikatahong hubog na kini nga naabot sa merkado publiko diin didto sab ang biktima nagbantay sa usa ka sari-sari store.

Ang biktima mialigar nga lain og taras ang suspek kay nasuko nga wala baligyai og beer ug nagwala hinungdan nga nagkaguliyang sa dapit.

Nisamot ang kagubot dihang gikuptan ang bukton ug abaga sa biktima ug dayong kumotkumot sa iyang dughan.

Nakugang ang mga tawo sa lugar ug ang biktima nakadagan paingon sa kapulisan.

“Redhorse beer gipangita niya hubog na daan pero gibalibaran kay liquor ban kay Enhanced Community Quarantine pa baya tungod sa Covid-19, iyaha naman hinuon gikumot ang dughan,” matod ni Macatangay.

Dugang ni Macatangay, nga sa pagrespondi sa iyang mga sakop, isog na kaayo ang suspek.

Gisumbag gilayon niini si Patrolman Alfie Maguiling, bisan sa pagsigeg panukmag niini ug dili magpadakop, naposasan gyud kini sa kapulisan.

Gawas sa iyang pag-ataki sa mga pulis, nagsige singit og “fu.. you,” dugang sa dirty finger ngadto sa mga pulis.

Kasong Act’s of lasciviousness, direct assault, ug kalapasan sa Republic Act (RA) 151 RPC alarm and scandal.