SHABU PANAGANG ALANG SA COVID-19?
Unom ang nasikop sa buybust sa Purok Magnolia, Sityo San Roque, Barangay Tungkil, lungsod sa Minglanilla atol sa joint operation sa Philippine Drug Enforcement Agency (PDEA) 7 ug Minglanilla Police Station sa Cebu Police Provincial Office (CPPO) kagahapon.
Si Inteligent Agent 1 (IA1) Dave Davila, team leader sa PDEA 7, maoy nangulo sa pagkasikop sa unom, niingon nga namuot sa rason sa usa ka dinakpan nga janitor sa dakong ospital sa dakbayan sa Sugbo nga mao kini ang iyang panagang batok sa Coronavirus disease 2019 (Covid-19).
Matod ni Davila, ang ilang target sa anti-llegal drugs
operation mao si Ronald Adlawan, 42, alyas Katol ug molupyo sa dapit.
Laing lima pa ang nadakpan niini sa maong operation nga sila si Larry James Pelabo, 26, janitor sa ospital ug taga Sityo Quimba, Barangay Cansujong, dakbayan sa Talisay; Rolly Abiadono, 18, alyas Boknoy; Rovergey Petangue, 22 alyas Indiyan Turko; Adones Abellana, 38, ug Bady Cabanero, 30, pulos taga Barangay Bulacao, dakbayan sa Talisay.
Nasakmit atol sa buy-bust ang moabot sa P108 mil nga balor sa shabu subay sa iyang Dangerous Drugs Board (DDB) value.
Matod ni Davila, taudtaod usab ang ilang monitoring kang Adlawan nga makonsiderar nga usa ka high value individual.
Apan si Adlawan mihimakak nga namaligya ug hinuon iyang giangkon nga kon dunay mga amigo niini anha maggamitan sa ilang panimalay.
Ang mga operatiba nakurat nga usa sa mga dinakpan nila usa ka janitor sa Vicente Sotto Memorial Medical Center (VSMMC)
Si Larry James Pelabo, kinsa miangkon nga matag suweldo niini, mogahin kini og P1,000 nga kwarta gikan sa iyang hinaguan aron mopalit.
Dugang ni Pelabo nga sa iya usab mopalit ang kadtong iyang mga kauban nga mga janitor sa trabaho aron makasustinir sa ilang trabaho ilabi na nga nangahadlok sila niining panahona tungod sa hulga sa Covid-19.
“Mao na lang na among pangdepensa sir kay nahadlok lagi mi anang virus,” pangatarongan pa sa dinakpan.