ECQ ipatuman sa Ormoc
Ormoc City, Leyte – Posible nga ipaubos sa Enhanced Community Quarantine (ECQ) ang dakbayan sa Ormoc, sumala ni Mayor Richard Gomez atol sa gipahigayon nga meeting sa Ormoc City Covid-19 Task Force.
Gipasabot sa mayor nga naobserbahan sa kapulisan sa dakbayan nga daghan ang gibalewala lang nga mga kamanduan ug patakaran batok sa Coronavirus Disease 2019 (Covid-19).
Dugang sa mayor, nga tungod ning maong mga report sama sa dili pagsul-ob og face masks ug walay social distancing hilabi na sa merkado publiko, mapugos siya pagdeklarar og ECQ sa tibuok Ormoc.
“If the people will continue to disobey our orders then we will be forced to place Ormoc City under Enhanced Community Quarantine,” matod ni Gomez.
Gipasabot sa mayor nga kon madayon ang ECQ, mas estrikto na kini kon itandi sa General Community Quarantine nga gihimo karon sa Ormoc.
“Mas strikto na pag mag ECQ ta. Usa lang ka tawo ang pwede mogawas kada balay and dapat naa siya quarantine pass,” pasabot niini.
Naobserbahan sa mga opisyal nga sa miaging mga adlaw, mura og nibalik sa normal ang mga tawo sa siyudad diin nakita ang daghan nga mga sakyanan nga nagdagan ug pagpundok sa mga tawo.
Ang kapulisan nipasabot nga tungod kini kay daghan ang nagkuha sa ilang kwarta sa Pantawid Pamilyang Pilipino Program (4Ps) ug hilabi niadtong miaging Semana Santa nga daghan ang namalit sa merkado.
Mayoriya sa netizens ang mipabor nga ipaubos sa ECQ ang dakbayan kon kini ang nakita sa mayor nga makaayo sa dakbayan.
Gisiguro ni Gomez nga andam usab ang lokal nga kagamhanan nga ayudahan ang mga tawo kon ingkaso madayon ang pagdeklarar og ECQ.
Hangtud sa Abril 30, 2020, ang General Community Quarantine sa Ormoc City.
Sa interbyu sa Krusada, gitubag sa mayor ang pangutana kon posible nga mapadayon kini human sa Abril 30.
“If ang conditions will not improve ug ang Manila naka-lockdown pa and the whole Luzon, there is a big possibility diri sa Ormoc City mao lang gihapon, i-extend nato ang ato executive order labi na karon ang Cebu is affected pa sila sa. So, there is a big chance na ma-extend pa ang executive order nako diri sa Ormoc for one month. Ang ako hangyo magtinabangay lang ta,” matod sa mayor.
Sa miaging Biyernes, gikompirmar sa Department of Health (DOH) Eastern Visayas ang labing una nga kaso sa Covid-19 sa lalawigan sa Leyte nga gikan sa lungsod sa Burauen.
Si Gomez dali nga mimando sa kapulisan nga hugtan ang seguridad sa checkpoint sa border sa Ormoc ug Burauen nga nahimutang sa Barangay Liberty diin mga 20 kilometros gikan niini mao na ang Burauen proper.