Immune system

Mga batid sa panglawas ug siyensiya sa tibuok kalibotan pulos nagkanayon nga ang lig-ong immune system maoy nag-unang panagang sa lawas batok sa Coronavirus disease 2019 (Covid-19) o bisan unsang matang sa virus ug kagaw. Usa ka health site Internet nagkanayon nga kini nga sistema sa 'complex network of cells and proteins' nga modepensa sa lawas batok sa bisan unsang inpeksiyon. Ang sistema nalakip sa white blood cells, antibodies, complement system, lymphatic system, spleen, thymus, ug bone marrow.

Ang immune system maoy sundalo sa slawas apan kinahanglang magpabilin silang himsog aron epektibo sa iyang tahas. Kon huyang, dali mapukan sa virus hinungdan nga makasakit hangtod mamatay kon dili madala sa medisina.

Unsaon nga magpabiling himsog ang immune system? Sumala sa mga batid, makaayo sa sistema ang pagkaon sa saktong oras, balanse sa nutrition ug bitamina uban sa sakto pagpahuway o katulog. Walay bisyo sama sa pag-inom og alak, pagpanigarilyo ug uban pa.

Dinhi bahina kuwestiyonable kaayo ang kadaghanan kanato. Usa seguro kini sa mga hinungdan sa nagkataas nga kaso sa Covid-19 sa Sugbo. Dili na baba-inom man kadtong unang tulo nga nagpositibo sa Sityo Zapatera, Brgy. Luz, dakbayan sa Sugbo. Pipila lang ka adlaw, karon niabot na og 80 ka kaso? Dugang pa ang kakabus sa kahimtang sa palibot.

Ang Enhanced Community Quarantine (ECQ) kon lugwayan pa pag-ayo, malikay tuod sa Covid-19 apan magkahuyang usab ang immune system sa kadaghanan. Segurado nga dili balanse ang pagkaon, ang sagad gipangpundo aron molahutay mao ang mga linata, noodles ug karne. Ang utanon, gawas nga nihit ning panahona, dili mahipos og dugay.

Kon lugwayan ang ECQ, kinahanglang andam ang supply og utanon o saktong pagkaon alang sa kahimsong sa immune system. Apan asa usab og igong supply sa utanon? Labad sa ulo.