Alphabetical ba ang mga tungol?

Sa wa pay social distancing, sigi ang mga tapok-tapok. Sa usa niini, dihay nagpasiatab nga nakaila siya sa tanang mga isda sa dagat. Usa ka tawo nga magpakahilom lang nikalit og tingog, “Saba diha. Wa man gani ko manghambog nga nukos ko.” Nahilom ang tanan kay Nukos diay ang apelyido sa maong tawo.

Apan ang mga mananagat maoy labing suhito sa mga isda.

Nahinumdom ko sa akong amigong mananagat. Niingon siya nga nindot unta kaayo kon magkasinabot ang mga isda kon unsa silang adlawa manggawas. Ayaw lang sa Lunes kay tingpahuway ni human sa tagay sa Dominggo.

Kon siya ang pabut-on, sa Martes manggawas kadtong mga isda nga nagsugod sa A, B, C ug D sama sa aha-an, anduhaw, awa, bakasi, bansikol, bawo, banak, bangsi, barikis, bilong-bilong, barungoy, budburon, buhaong, bulinaw, buriring, butete, buwan-buwan ug danggit.

Sa Miyerkules, E, F, G ug H na sab sama sa gisaw, guno, halwantasik ug hawol-hawol. Sa Huwebes, mga isda nga nagsugod sa I, J K ug L sama sa ibis, iho, indangan, indong, ito, katambak, kitong, kiyampaw, libod ug lipti. Sa Biyernes, M, N, O ug P, sama sa mahinlo, malasugi, maming, mamsa, mangsi,, mulmol, pad-pad, pagi, pandawan, pakol, putpot ug pugapo.

Unya sa Sabado, Q, R, S, T ug U na sab sama sa rumpi-kandado, sagoksok, salmin, saosap, solid, suno, sunogan, sunghan, tamarong, tamban, tuloy, tangige, tikab, tulingan ug ubod.

Ang Dominggo alang unta sa V, W, X, Y ug Z pero way mga isda anang mga letraha.

Wa ko magdahom nga ang iyang hunahuna natuman, apan dili sa mga isda, kon dili, sa mga mamalitay sa Carbon Public Market, ang labing dakong merkado publiko sa siyudad sa Sugbo. Ang tumong niini mao ang social distancing.

Sama sa mga isda, alphabetical na karon ang mga mamalitay sa Carbon gikan sa Martes ngadto sa Dominggo. Way Lunes kay gitagana karong adlawa sa pag-disinfect sa tibuok merkado gikan sa coronavirus.

Epektibo kini alang sa social distancing. Apan matod pa sa taga Cabadiangan, maayo lagi kon ang mga tungol sa mga tawo, sama sa ilang mga apelyido, alphabetical sab ang pagbati og gutom.