Lockdown na ang mga eskina

Nunot sa pagsaka sa mga kaso sa Coronavirus disease 2019 (Covid-19) dinhi sa dakbayan sa Sugbo, way kompiyansa ang mga tawo. Sa mga entrance sa eskinita ang mga molupyo dali nga nakapamutang og mga ali ug kini gibantayan 24 oras.

Namungingi sa mga abiso nga nag-awhag sa mga tawo nga mosud sa pagsul-ob og face mask apil na ang pagkwentas sa ilang quarantine pass. No face mask, no quarantine pass, no entry.

Mao ni ang mga abiso nga angayang sundon sa mga tawo nga mosud sa mga interior nga bahin apil na ang mga molupyo. Gusto silang makasiguro nga ang mosud ug mogawas kay mga molupyo sa maong dapit.

Gumikan niini, di malikayan ang mga lalis nga usahay mosangko pa sa barangay. Pananglit molupyo ka sa maong sitio unya taudtaod na ka nga wala mopakita. Natural, nga unyag balik nimo sukitsukiton ka sa imong mga silingan. Pangutan-on ka kon diin ka gikan. Pananglit ang imong tubag gikan ka sa Barrio Luz normal lang nga maalarma ang mga nagbantay. Dako ang posibilidad nga di ka pasudlon. Kon ang imong tubag gikan ka sa ospital mao gihapon ang mahitabo. Bisan didto sa probinsiya gipasidan-an ang mga tawo sa pag-report sa barangay kon dunay mga tawo nga moabot nga gikan sa dakbayan sa Sugbo o sa mga dapit nga may mga kaso sa coronavirus. Kini bisan kon ang niabot nga molupyo sa maong dapit. Kining tanan tungod sa padayon nga pagsaka sa mga kaso nga sa sayo pa, gibaliwala lang natong tanan.

Atong pasidaan niadtong magbalhinbalhin og puyo. Ayaw gyud na ninyo buhata kay siguradong dudahan ka nga nagdala sa makamatay nga virus. ○○○

Nagpadala nako og mensahe ang Public Information

Officer sa Vicente Sotto Memorial Medical Center. Siya nag-awhag sa publiko nga unta panggaon ug sabton ang medical frontliners nga moagi sa ilang dapit. Ambot sab ning uban nga makakita og tawo nga nag-uniporne og puti mura man og nakakita og abat.

Ang Philippine National Police (PNP) padayon karong nag-imbestigar sa mga kaso diin gi-harass ang medical frontliners. Matod ni Nonoy Mongaya, luoy kaayo ni sila sanglit kinabuhi nila ang gisugal pagtambal sa mga nangasakit sa Covid-19. Angayan lang nga respetuhon sila ug dili bugalbugalan o dagmalan. ○○○

Usa ka molupyo sa usa sa mga barangay sa siyudad sa Carcar nakahunahuna pagtabang sa mga senior citizen pagpamalit sa ilang tambal.

Si Brentley Loquillano Saducas nga taga Liboron, nipahibalo nako nga sugod gahapon niboluntaryo siya ug ang iyang bana nga maoy mopalit sa mga tambal alang sa mga senior sa ilang dapit.

Pinaagi sa iyang Facebook ug Messenger, anhi dinhi ipadangat sa mga senior unsa nga tambal ang ilang ipapalit. Human mapalit personal kining ihatod sa pinuy-anan sa senior. Sa ingon niini nga paagi malikayan sa senior ang kahasol sa paggawas sa balay ug ang taas kaayo nga linya nga iyang sagubangon.

Isip pang gasolina, niingon si Saducas nga kon pila ang plite padung sa botika ug balik sa pinuy-anan sa senior mao ra sab ang ilang kubrahon. Kadtong mga senior nga gustong makapahimulos sa ilang discount, ipadala lang ang mga gikinahanglang dokumento apil na ang authorization letter.

Dakong tabang tuod ni alang sa mga senior nga maglisod na sa pagpalit sa ilang maintenance. Door to door ang delivery sumala pa ni Saducas. Gawas sa tambal, nagplano sab si Saducas nga iapil unya ang groceries.