I want to be in love

Tinuod man sab ang giingon ko kang Sol. Nagkasabot man gyud mi si Al nga magkita. Apan wa lagi madayon tungod sa pagkatap sa Coronavirus disease sa siyudad.

“Unya, Kathy, nagsige gihapon mog kontakay sa selpon?”

“Aw, oo, uy. Gusto unta kong makadungog sa iyang tingog pero di man siya motubag kon akong tawgan. Di sab siya motawag nako. Ang amo lang gibuhat mao ang pagteksanay.”

“Aw, unsa pa man diay, Kath? Textmate gud.”

Mikatawa si Sol nga mihunong sa pag-move sa iyang piyesa. Miyangu-yango ko.

“Bitaw, no, Sol? Korek ka sab ana, da.”

Nahikatawa na lang sab ko. Nahilom si Sol. Mipasiplat ko niya. Seryuso na siya nga naghinuktok samtang nagtan-aw sa among mga piyesa. Giatake ko ang iyang hari. Morag lisod na nga makalingkawas ang iyang hari sa akong queen, rooks ug knights. “Tsak!! Tsak! Nalipat ko, da.” Nakapanglingo si Sol. Wa na gyud siyay nahimo. Namate gyud ang iyang hari. Nakig-aper ko niya.

“Patas na ta, Sol. Tagsay daog ug tagsay pilde.”

“Ugma na sab ta magduwa, Kathy. Misakit na ang akong ulo sa pagpininsar.”

“Mao sab ko, Sol. Unsaon, mogamit man gyud ta sa atong utok aning duwa sa chess.”

Gitabangan ko sa paghipos si Sol sa mga piyesa nga among gipanulod sa chessboard. Unya nagpabilin mi sa among gilingkoran.

“Kumusta na man diay ang imong lovelife, Sol? Wa man gyud ko kabalita nga duna kay uyab, o gipangulitawhan man lang?”

“Makahuwat man nang gugma, Kathy. Nag-concentrate ko sa akong study sa pagka karon.”

“Hmmm!” Giuyonan ko si Sol. Unya nahunahuna ko si Al. Sa akong paniid guwapo siya. Na-feel gyud nako kini.

“Kon pangulitawhan ka ni Al, Kath, sugton nimo siya bisan wa pa mo magkita?”

“Depende, Sol. I mean, kon love nako siya, aw ako gyung sugton. Agad lang gud sa pinitik sa akong kasingkasing.”

Sukad sa akong pagka dalaga, wa pa gyud ko makasuway og pakig-boyfriend.

(SUMPAYAN)