CONE NAGHANDOM GIHAPON NI GREG
Giangkon ni Brgy. Ginebra Gin Kings coach Tim Cone nga wala na siya'y balita kang Greg Slaughter sukad mibalik ang 7-footer sa Amerika atol sa miaging off-season sa Philippine Basketball Association (PBA).
Ang nasayran ra ni Cone kabahin kang Slaughter mao ang gipang-post niini sa social media diin nakita ang Fil-Am nga magduduwa nga nagpraktis kauban ang kanhi sakop sa Gin Kings nga si Chris Ellis.
“I haven't had any communication with him aside from seeing things that had been on social media a couple of times,” batbat ni Cone nga napatik sa www.spin.ph.
Nakadesisyon ang produkto sa University of the Visayas (UV) Green Lancers nga mopahuway una pagduwa sa PBA human mi-expire ang kontrata niini sa Gin Kings niadtong Enero ning tuiga.
Nakigsulti si Slaughter kang Cone kabahin sa iyang desisyon human naangkon sa Gin Kings ang titulo sa Governor's Cup sa miaging season.
Nanghinaot si Cone nga ang pagkahunong sa mga duwa sa bag-on season gumikan sa coronavirus disease 2019 (Covid-19) makahatag kang Slaughter og igong panahon aron makahunahuna kon unsay angayan niining buhaton sa ugma damlag.
“Maybe he'll be ready to come back and be fresh minded and ready to go,” matod ni Cone.
Kon naa si Slaughter, dako og kahigayunan ang Gin Kings nga mailog ang prestisyusong Philippine Cup title gikan sa San Miguel gumikan kay wala ang pambatong higante sa Beermen nga si June Mar Fajardo.
Si Fajardo nakasinati og grabeng angol sa tiil nga nagkinahanglan og taas nga panahon alang sa pagpaalim.
Gibalik-lantaw ni Cone ang 2017 Philippine Cup finals series diin nakigduwa ang Gin Kings sa Beermen nga wala si Slaughter.
“Greg didn't play in that series because he was injured at the time. We didn't have him at that point and they (Beermen) just ripped us apart,” matod ni Cone.
Niadtong higayuna, gimakmak sa Beermen ang Gin Kings sa best-of-seven series, 4-1.
Kon magkrus og balik ang ilang dalan sa finals, dako ang pagtuo ni Cone nga mabawsan nila ang Beermen hilabi na kon naa si Slaughter.
“There's such a maturation process on our team especially in terms of Japeth Aguilar. And Stanley (Pringle) changes the way we play and we made a natural progression forward,” pasabot sa 2-time Grandslam winner coach.
Niadtong 2018 Comissioner's Cup finals series diin naa si Slaughter, gipangbuntog sa Gin Kings ang Beermen, 4-2.
Hinuon dili malalis nga ang gipangandoy gyud sa matag team mao ang Philippine Cup title nga gipatigbabawan sa Beermen sa miaging lima ka mga tuig.
“This would have been our first All-Filipino chance with Stanley in our lineup. And if we happen to bring Greg to our lineup, yes I think we can be a force in the All-Filipino,” matod ni Cone.