June Mar komportabli sa dagan sa iyang pagpaalim

Gibutyag ni San Miguel Beermen star center June Mar Fajardo nga maayo ang dagan sa iyang pagpaalim sa angol sa iyang tuo nga tiil nga iyang nasinati.

Gipasalig sa Sugboanong higante nga mobawi siya sa panahon nga hingpit na siyang maalim ning maong angol.

Ang produkto sa University of Cebu (UC) Webmasters gipaubos sa operasyon niadtong Pebrero, 2020 ug nagkinahanglan kini'g taas nga panahon alang sa rehabilitasyon.

“Okay naman. Ngayon nakakalakad na ako. Siguro nasa 70, 80 percent na ng weight ko pwede kong ilagay sa paa ko,” asoy ni Fajardo dihang nahimo siyang dinapit sa 2OT podcast. “Ayun, siguro baka next month, makakalakad na ako nang walang crutches, walang walker.”

Ang 6'10" nga magduduwa nagsakay og mobility scooter dihang gidawat niya ang iyang ikaunom nga sunodsunod nga MVP award atol sa opening ceremony sa 45th season sa Philippine Basketball Association (PBA) niadtong Marso 8, 2020 sa Araneta Coliseum.

Samtang nagpaalim si Fajardo, gipangsuspenso sa PBA ang ilang mga duwa gumikan sa hulga sa coronavirus disease (Covid-19). Ang San Miguel mitataw nga dili nila ahaton ang pagbalik ni Fajardo.

“Gagawin ko ang lahat para maganda ang recovery ko. Sa ngayon, iniisip ko kung paano lumakas uli, gumaling ang injury ko, proper healing,” pasabot ni Fajardo. “Syempre pagbalik ko malaking trabaho ‘yun. Ilang months din ‘yun. Kailangan ko pa habulin yung stamina ko, yung timing ko. Pero makukuha ko rin naman ‘yun. Marami pa akong goals sa PBA, para sa team. ”

Asoy ni Fajardo nga kon hingpit nang maalim ang iyang angol, tinguha niyang palambuon pa'g maayo ang iyang perimeter shooting aron idugang sa iyang mga kahanas.