MARCIAL ANDAM MAG PRO BOXER
Tanyag dawaton, pero moaway gihapon sa Tokyo Olympics
Giangkon sa usa sa nagunang amateur boxers sa Pilipinas nga si Eumir Marcial nga lisod balibaran ang mga tanyag nga iyang nadawat gikan sa professional boxing.
Matod niya, dako ang poruhan nga adunay tanyag nga iyang dawaton.
Apan iyang gitataw nga wala kini nagpasabot nga iya nang ipadaplin ang iyang pangandoy nga makahatag sa Pilipinas sa labing unang gold medal niini sa Olympics.
"Tinitiyak ko sa lahat ng Pilipino, lalaban at lalaban ako sa Olympics kasi under sa rules, pwede ang pro boxers na lumaro sa Olympics simula pa noong 2016," pasabot ni Marcial nga napatik sa www. abs-cbnnews.com. Si Marcial adunay saktong kusog sa iyang duha ka mga kamot nga nagsilbing hiyas sa iyang makapaukyab nga estilo. Kini maoy hinungdan nga daghang promoters sa professional boxing ang gustong mokuha kaniya.
Unang nakitaan og dakong potensyal si Marcial niadtong 2011 dihang nakalangkat siya og gold medal sa AIBA Youth World Boxing Championships. Nipatigbabaw sab siya sa middleweight division sa miaging tulo ka mga edisyon sa Southeast Asian Games unya nakaangkon siya og silver medal sa 2019 AIBA World Championships.
Nakalangkat sab siya og gold medal sa Olympic qualifier event sa Jordan niadtong Marso ning tuiga.
Si Ed Picson, secretary-general sa Association of Boxing Alliances in the Philippines, nipadayag sa ABS-CBN nga ang
national governing body sa boksing mohatag og kinatibuk-ang suporta kang Marcial alang sa pagtuman sa pangandoy niini nga gold medal sa Olympics. Bisan mosaka na siya sa
professional boxing, gitino ni Marcial nga buhaton niya ang tanan aron molampos sa umaabot nga Tokyo Olympics.
“Wala din akong nakikita na distractions kung mag-professional ako dahil magiging focused na focused ako sa training ko para sa Olympics kasi alam ko na secure ang future ko at ng aking pamilya kung tanggapin ko man ang offer na mag-professional," pasabot ni Marcial. Ang Tokyo Olympics orihinal nga gikatakda karon untang Hulyo ning tuiga apan nauswag kini sa sunod tuig gumikan sa hulga sa coronavirus disease 2019 (Covid-19).