PBA angay nang ibalik sa duha ka conference: Eala

Nagkanayon ang kanhi komisyoner sa Philippine Basketball Association (PBA) nga si Noli Eala nga wala siya’y nakitang sayop kon hangupon og balik sa liga ang duha ka mga komperensiya nga format imbes nga tulo.

Dili na kini bag-o alang kang Eala, kinsa migamit na ning maong sestima dihang siya pa ang komisyoner sa liga niadtong 2004-07.

Ang mipuli kang Eala nga si Sonny Barrios migamit sab niining maong pamaagi sulod sa duha ka mga tuig una gibalik ni Chito Salud ang tulo ka mga komperensiya nga format sugod niadtong 2010.

Ang paghangop og balik sa duha ka mga komperensiya nga format nasulod na sab sa alimpatakan sa kasamtangan komisyoner nga si Willie Marcial

gumikan sa kahasol nga hatod sa coronavirus disease (Covid-19).

Napugos si Marcial nga temporaryong hunungon ang aksyon sa 45th season gumikan sa Covid-19 pagkahuman dayon sa opening ceremony niini.

Alang kang Eala, kinsa usa na ka sports broadcaster, karon maoy saktong panahon aron ibalik ang duha ka mga komperensya nga format.

“Maybe this is the time to make that adjustment. Hindi po natin alam kung ano ang iniisip ng ating kaibigan na si commissioner Willie Marcial, but meron na pong batayan at meron nang basehan na nagawa noong araw,” pasabot ni Eala sa iyang highly-rated radio program nga napatik sa Spin.ph.

Hinuon gitataw ni Eala nga iyaha lang kini nga opinyon ug ang kasamtangan liderato na ang modesisyon niini.

Giklaro ni Eala nga sukad pa kaniadto, nagtuo siya nga ang pagsunod sa duha ka mga komperensya nga format makaayo sa PBA hilabi na kay gikan sa liga ang mga magduduwa nga molangkob sa national team.

Gipasabot ni Eala nga kon tulo ka mga komperensiya, Seguradong maguba ang eskedyul sa PBA kon adunay misyon ang national team.

“I’ve always said the PBA is better off with a two-conference format,“matod ni Eala.

“The most important of all, talagang malaking serbisyo yan para sa national team. Alam naman natin ngayon ang FIBA iba na ang kanilang sistema at kahit papaano nadi-disrupt talaga ang ating PBA schedule.”

Kon duha lang ka mga komperensiya, gitino ni Eala nga mabalanse og in sakto sa PBA ang ilang eskedyul basi sa tahas sa national team.