BJMP HAGBAY RANG NANAGANA BATOK COVID

Dugay rang nagpatuman og mga lakang ang Bureau of Jail Management and Penology (BJMP) 7 aron di matakdan ang mga binilanggo sud sa mga pasilidad nga ilang gidumala sa coronavirus disease (Covid-19).

Unang lakang nga ilang gihimo mao ang pagdili na sa mga kabanay sa pagbisita.

Karon nga duna nay duha ka mga piniriso ug duha ka jail officers sa Cebu City Jail (CCJ) nga positibo sa Covid-19, ilang giawhag ang mga kabanay nga di na lang magpadala og mga pagkaon.

Tipik kini sa lain nilang lakang aron di makakatap ang Covid.

Matod ni Jail Senior Inspector Jay Ylanan, tigpamaba sa BJMP 7, nga bisan sobra na ang gidaghanon sa mga binilanggo, ila gihapon nga gipatuman ang social distancing piniriso, kanunay nga pagpanghugas sa kamot ug pagpasul-ob og mask.

“Lisod man kaayo ang atoang jail no nga overcrowded man gyud, we are doing precautionary measures like still social distancing as much as possible, hand washing, mask nila provided sad gyud,” matod ni Ylanan sa tele press conference.

Gipanghatagan usab ang tanang inmates ug personnel og food supplement sama sa bitamina aron molig-on ang immune system.

Si Ylanan, kinsa usab ka doktor, niingon nga basta ting-init, naa kanunay ang influenza like-illness (ILI), usa sa mga sakit nga gibantayan kay apil kini sa mga simtomas sa Covid-19. Duna silay gipanglain na nga mga piniriso nga naa ning sakita.

Kon duna may mga pagkaon nga ipadala alang sa mga piniriso gikan sa gawas, ila na kining ipa-disinfect.

Si Ylanan nisugyot ngadto sa mga jail warden nga unta, likayan ang pagpasulod og mga pagkaon gikan sa gawas kay hayan mao kini ang tinubdan sa infection.

“Ako man untang suggestion nga dapat nga lessen gyud na kay diha man gud usahay sad gikan kay wala ta kahibawo sa mga asymptomatic, as much as possible, ma-lessen na nato,” matod ni Ylanan.

Samtang ang Mandaue City Jail niadto rang tunga-tunga sa miaging buwan nagdili sa mga bisita. Mao kini ang gibutyag ni Jail Warden Gil Inopia sa Superbalita Cebu, kinsa niingon nga Marso 14 pa kini nila gipatuman.

Nag mask na sila ug aron maapod, sila mismo ang nanggama pinaagi sa abag sa mga piniriso nga kahibawo manahi ug sa Mandaue City College Technological, Entrepreneurial and Skills.

Naa usab silay selda alang sa isolation sa bag-ong mga piniriso. Matod ni Ornopia nga ila kining kuhaan og profile, pakaliguon una pa pasudlon ug ibutang sa isolation cell suds a 14 ka adlaw.

Kon dunay mga simtomas, duna silay medical team nga dunay personal protective equipment (PPE) nga mohiling.

Duna silay upat ka mga piniriso nga gi-swab test, apan pulos negatibo sa Covid.

Sagad sa mga sakit sa mga piniriso mao ang pagpanghupong tungod kay wa nay exercise.