MARTIAL LAW STYLE ECQ IPATUMAN?
GIPANGANDAMAN SA PRO 7; LOCAL OFFICIALS ANDAM MOTUMAN
Kapulisan sa Central Visayas andam mopatuman sa susama og martial law nga pamaagi sa enhanced community quarantine (ECQ) aron mapadali ang pagpugong sa pagkatap sa coronavirus disease (Covid-19).
Kini taliwa usab sa pagsupak sa daghang mga tawo sa enhanced community quarantine (ECQ) nga nagtukmod sa tulo gani ka local government units (LGU) sa number coding sa mga sakyanan.
Kon madayon ang pagpatuman, duna nay mga sundawo ug pulis nga mag-roving sa mga barangay alang sa ECQ, social distancing ug pagsul-ob og mask. Estrikto na kining ipatuman sa mga awtoridad.
Gipahibawo sa Police Regional Office 7 nga andam na sila nga ipatuman ang sama sa martial law nga pamaagi sa ECQ sa Rehiyon 7 human si President Rodrigo Duterte mipahibawo nga iya nang gamiton ang militar ug ang kapulisan pagbantay sa mga tawo aron di na manggawas sa ilang balay.
Matod ni PRO 7 Director Police Brigadier General Albert Ignatius Ferro nga aron dali ang pagpugong sa pagkuyanap sa virus, kinahanglan ang extreme nga pagpatuman sa ECQ sa publiko.
Iyang gipasabot nga ang novel
coronavirus di mokatap pa kon magpabilin sa ilang tagsa-tagsa ka mga balay ang mga tawo tungod kay wa nay matakdan.
“We’ve been prepared to execute the directive of our President to conduct extreme enhanced community quarantine
of this particular case,” matod ni Ferro sa mga tigbalita.
Apan iyang gipasabot nga di angay nga mahadlok ang publiko sa pulong nga martial law kon motuman lang sa mando sa gobyerno tungod kay isaka lang nila ang kaestrikto sa pagpatuman sa ECQ diin uban na ang mga sundawo nga mo roving sa kabarangayan.
“Actually, dili sila dapat mahadlok kon silay mga abiding
citizen. Mga Sugboanong maayo mosunod sa direktiba, dili sila mahadlok,” dugang ni Ferro.
SUPORTADO
Ang tulo usab ka mga mayor sa tulo ka dagkong mga siyudad sa Sugbo uyon sa martial law
style nga pagpatuman sa ECQ. Alang kanila, mao kini ang labing maayong paagi aron ang mga tawo magpuyo sa balay. Andam silang mopatuman niini.
Matod ni Cebu City Mayor Edgardo Labella, iyang naobserbahan nga dunay mga tawo nga wa motuman sa ECQ.
“I would comply the order of the President considering that discipline is very necessary at this point in time because it seems that inspite of the declaration of ECQ, others do not observe and do not follow,” matod ni Labella sa Superbalita Cebu.
Di siya magpanagana sa pagpatuman niini.
Mao usab si Mandaue City Mayor Jonas Cortes uyon sa martial law style nga ECQ.
Si Atty. John Eddu Ibanez, executive secretary ni Cortes, niingon nga kung unsa man ang mga ipatuman sa nasudnong gobyerno o sa Presidente, di magdumili si Cortes sa pagsuporta.
"Sobra pa sa uyon ko ana kay gahi og ulo ang mga tawo. Mao nang mapitol gyud tanan kay at least madaghan atong personnel. Additional force man na," matod ni Lapu-Lapu City Mayor Junard Chan.
Pinaagi niini, mapugos ang mga tawo sa pagpuyo sa balay.
Matod niya nga hapit na mag-usa ka buwan ang ECQ, apan daghan gihapon ang mga nanglapas.
Mao kini ang hinungdan nga naghuot ang mga prisohan.
Pinaagi sa martial law style, maka focus na sila sa pag-atiman sa panginahanglan sa iyang mga konstituente.