Beltran nakapyansa

Nakapyansa na ang multimedia artist ug manunuwat nga si Maria Victoria Beltran sa Martes, Abril 21, 2020, human siya gidakop sa kapolisan tungod sa pasangil nga siya nagpakatap og "fake news" mahitungod sa Covid-19.

Segun ni Vincent Isles, usa sa legal counsel ni Beltran, nga ila pang gitan-aw ang posibilidad nga mopasaka og mga reklamong administratiba ug kriminal batok kang Cebu City Mayor Edgardo Labella.

Gikompirmar usab niya nga nakapiyansa na ang iyang kliyente mga alas 2 sa hapon kagahapon.

"Around 1:30 or 2 p.m. naka post na siya og bail. Wa man ko didto gud. Nakagawas na siya; nakakuha na ta og Order of Release. I think she is already home right now," matod ni Isles.

Ang kantidad sa piyansa miabot sa P42,000 tanan alang sa tulo ka mga kaso.

Gidakop si Beltran pinaagi sa joint operation sa Regional Intelligence Division 7 ug sa Regional Anti-Cybercrime Unit 7 niadtong Dominggo, Abril 19, human siya gipasanginlan nga nagpakatap og fake news sa iyang Facebook account. Nag post si Beltran og usa ka "satirical" status sa iyang Facebook account nga aduna nay molapas sa 9,000 ka mga coronavirus disease 2019 (Covid-19) sa Cebu City.

“9,000+ new cases (all from Zapatera) of Covid-19 in Cebu City in one day. We are now the epicenter in the whole solar system,” sigun ni Beltran sa Facebook post.

Kini gi-share usab ni Labella sa iyang Facebook account ug nagkanayon nga iya na unyang ihatag sa mga polis ang pag gunit sa maong kaso.

Lakip sa mga kaso nga gipasaka batok kang Beltran mao ang: kalapasan sa Article 154 sa Revised Penal Code in relation to Section 6 of Republic Act No. 10175 kun Anti-Cybercrime Act of 2012,; kalapasan sa Section 6(f ) sa R.A. 11469 kun Bayanihan to Heal as One Act; ug kalapasan sa Section 9 (b) sa R.A. 11332 kun balaud sa mandatory reporting of certain diseases.

Matod ni Isles, maggikan gihapon ni Beltran ang desisyon kon unsay sunod nila nga lakang. Apan ila kining hatagan og menu of options para sa pagbarog sa iyang katungod.