CAR OWNERS GIBIRAHAN NI CAINDEC SA IYANG FB POST

Gibasol ni Land Transportation Office (LTO) 7 Director, Victor Caindec kadtong mga nanag-iya og sakyanan nga maoy hinungdan sa kahuot sa trapiko sa kalsada sa dakbayan sa Sugbo.

Usa ka kalapasan sa gipatuman nga enhanced community quarantine ang gihimo sa maong car owners nga mi-abuso sa paggamit sa enhanced community quarantine pass.

“Ang nahitabo kon pobre dili makagawas kay walay public transport, gibawal pa gyud Angkas. Apan kong datu, adunay sakyanan yano ra makagawas. Gibuhat namo sa LTO nga mopatas ang balaod sa quarantine.

“Sakto ba na nga molakaw kay mopalit ug Jollibee or di ba kaha milk tea? Essential na?,” yawyaw ni Caindec diha sa iyang Facebook post.

Niadtong nakalabay nga semana, liboan ka mga sakyanan ang natala sa LTO7 nga nagdagan gihapon sa dakbayan sa Sugbo, bisan paman sa Executive Order No. 64 ni Cebu City Mayor Edgardo Labella nga adunay suspensyon sa tanang publikong o pribadong sakyanan, gawas niadtong exempted.

“Daghan adunahan nasuko tungod sa among gibuhat. Na traffic kuno sila sa among checkpoint. Ang pobre, unsaon og ka traffic nga di man gani maka gawas! Unsa man diay ang balaod, di ba para sa tanan?”

“Quarantine ang gibuhat sa gobyerno para dili ta maigo sa covid virus. Ngano og molakaw ang dato, dili sila ma dutlan ug virus o di ba kaha makakalat ani nga sakit?” tipik sa post ni Caindec.

Tungod sa Facebook Live ni Caindec niadtong nakalabay nga semana diin gipakita niini ang taas nga linya sa mga sakyanan sa Banilad-Talamban road, gipaubos na sa number coding o scheming kining mga sakyanan nga mamahimong makagawas sa kadalanan sa dakbayan sa Sugbo.

“Kami sa LTO, at risk pud me. Abi ninyo wala nag reklamo among mga pamilya? Abi ninyo wala mi nahadlok nga matakdan anang Covid-19? Abi ninyo wala mi nabalaka nga sa kada sakyanan amo gihunong wala nagtakod a risgo among mga lawas?.” dugang pa sa opisyal.

Dugang ni Caindec nga undangon na sa publiko ang pagpangdaot sa ilahang ahensiya tungod kay dili kini ang solusyon sa giatubang karon nga krisis.

“Pero stop undermining what we do. Kana ganing moingon nga magpa epal mi, sa inyo tan-aw maka salbar na namo ug ma igo mi sa COVID? Kanang pasangil nga nangawarta mi, sakto ra kaha na para igasto ug simbako masakit mi or among pamilya?” birada ni direktor.