Targeted mass testing himuon sa Sugbo
Mopahigayon og targeted mass testing ang Cebu Provincial Capitol alang ngadto sa mga Sugboanon sa pinaagi sa rapid test kits.
Kini aron nga molig-on ang antibodies ang mga Sugboanon, ug kapugngan nga magtakod-takod ngadto sa lain pang tawo.
Kini maoy gipahibaw ni Gobernador Gwendolyn Garcia kagahapon, Abril 21 atol sa regular press conference sa kapitolyo.
“Mopahigyon na og targeted mass testing ang probinsya sa Sugbo sa mga Sugboanon sa mga kalungsoran ug isla. Mao kini ang mo testing sa kada-isa kung naa bay adequate number of antibodies nga aduna tay measure of assurance nga kung ikaw mobali ug trabaho, dili ka maka-infect sa uban,” pasabot sa gobernador.
Si Garcia nagkanayon nga mas maayo nga mangandam daan ug dili mokumpyansa.
“We are preparing for the worst, kinahanglan andam ta apan sa atong rapid testing, we are expecting and hoping for the best. We expect for the worst but we hope for the best,” dason sa gobernador.
Kuhaon sa kapitolyo ang demographics aron makuha ang tukmang gidaghanon sa populasyon.
Moabot sa 30,000 ngadto sa 50,000 ka mga rapid test kits ang gitinguha nga paliton sa lalawigan alang sa himuong test sa mga Sugboanon.
Lakip sa mga ipaubos sa maong test ang mga piniriso sa Cebu Provincial Detention and Rehabilitation Center (CPDRC).
“Ug aduna na tay scientific data pinaagi aning rapid targeted mass testing, then, mahimo na tang modefine ug plano, direksyon, pamaagi, protocol, procedure ug unsao ta ni nga ang panginabuhi ninyo sa tagsa tagsa ka lungsod sa mga dakbayan mahinay-hinay nato ug pabalik,” matod pa sa opisyal.
Gi-angkon si Garcia nga bisan pa man og may giapod-apod na nga ayuda og rasyon sa mga Sugboanon, apan aduna kiniy kinutuban, ilabi na sa possibleng pagpadayon sa pag-ubos sa ekonomiya.
Sa higayon nga magpadayon ang krisis nga giatubang dili lang sa lalawigan apang lukop nasud tungod sa Covid-19 pandemic.
“Sa atong gipangandam karon asa niining mga negosyo ang pwede na natong ablihan kung naa natay klaro nga scientific data kung unsay estado gyud ninyo sa tagsa tagsa ka lungsod ug dakbayan,” matod pa ni Garcia.
Sukad sa pagluwat ug kamandoan ni Garcia pagpaubos sa probinsya sa Enhanced Community Quarantine (ECQ) sa Marso 30, 2020, wala pay tukmang petsa sa pagpatuman niini.
Mipasalig si Garcia nga kon makigtambayayong ang mga Sugboanon sa pagpugong sa pagkatap sa kagaw, pinaagi sa pagtuman sa protocols ug guidelines mas dali nga masumpo ang maong virus.