Covid-19 cases sa Cebu City

Paita sa giatubang karon nga problema ni Cebu City Mayor Edgardo Labella gumikan sa nagsaka nga kaso sa Covid-19 sa dakbayan.

Wa pa mahurot og kuha ug swab samples ang nuybe mil ka mga tawo nga nagpuyo sa Sitio Zapatera, Barangay Luz, dunay nahimong positive nga kapin na sa usa ka gatus.

Wa pay labot niini ang 35 mil ka mga lumolupyo sa ubang sitio sa barangay. Ang Department of Health (DOH) 7 ug Cebu City Health Department mikonsiderar nga ang nuybe mil nga infected na.

Sa Cebu City Jail sa Barangay Kalunasan dunay duha nga positibo ang usa niini priso ug laing usa ka jail officer. Di ni sayon kay ang City Jail dunay 6,582 ka mga piniriso. Naghuot sa silda.

Ang ato ra matampo sa gobyerno ni Labella sa kampanya batok sa Covid-19 ang pagsunod sa Enhanced Community Quarantine (ECQ) ug ayaw mo og laaglaag.

Ang problema karon nga giatubang sa mayor, ato ning tanan! Wa pa gani makuha-i og swab samples ang squatter's area sa mga barangay. Sa probinsya sa Sugbo, di kaayo tanto ang labad sa ulo ni Gobernador Gwen Garcia kay tulo ra ka mga kaso gikan sa siyudad sa Talisay ug lungsod sa Consolacion.

Samtang, 11 sa Lapulapu City ug 6 sa Mandaue City .

Akong gisuwayan og tawag ang mga mayor sama ni Talisay Mayor Samsam Gullas aron kuhaan og reaksyon way motubag sa bagting sa cellphone.

Mitubag hinuon si Mayor Merlou Derama sa lungsod sa Boljoon, pinaagi sa pag-ingon nga kaluoy sa Ginuo, istriktong gihugtan ang pagbantay subay sa kamandoan ni Garcia. Gidugang sa mayor sa interview sa Mata Agila, ang pagpangunay sa pagbisita sa mga border sa ilang lungsod bisan pa og zero sila sa kaso sa Covid-19.

Gibisita sab sa mayor ang mga nagkadaiyang barangay aron pagpaminaw sa mga panginahanglan ug problema sa mga molupyo.

Iyang gipanawagan ang mga kritiko sa krisis nga gidala sa Covid-19. gikinahanglan ang pagtinabangay. Email:efrenlonzon71@gmail.com o text:09235562777