4Ps angay na nga undangon
Lisud sabton ning mga tawo usahay. Gihatagan na sa kahigayonan nga makasuweldo bisan kon dunay gipatuman nga kwarantinas. Bisan ang uban gidid-an nga makagawas o makapanginabuhi, kining uban natong mga kaigsuonan gitugotan gihapon nga makapangita og panginabuhi.
Ang akong gipasabot ang mga drayber sa mga trak-dekarga nga magbiyahian og mga utanon ug uban pang susama nga pagkaon.
Gihatagan ang drayber ug ang helper og ID samtang duna sab silay Food Pass aron maka lusot-lusot lang sila sa mga checkpoint.
Apan unsay ilang gibuhat? Ang uban kanila nag-ismagol sa mga pasahero bisan nasayod sila nga gidili kini.
Gibuhat nila kini aron lang makasapi, dugang sa ilang inadlaw nga sweldo.
Gibale-wala lang nila ang pahimangno sa gobernador batok niini hasta ang gimando nga paglikay sa pagkuyanap sa maong sakit.
Unsa may angay buhaton kon masakpan sila?
I-kansela ba ang Food Pass nga gi-issue sa maong kompaniya? Kon buhaton kini, maapektohan ang pagpanghakot sa mga pagkaon ug daghan ang masakripisyo tungod lang sa pagpanapi sa drayber o helper.
Og susama lang kini sa gina-ingon nga gisilotan si Juan sa sala ni Pedro.
Kon ikansela ang ID sa drayber ug helper?
Parehas lang gihapon ang epekto sanglit dili na man maka-biyahe ang maong sakyanan.
Gawas pa nga lisod usab kini buhaton.
Unsa kahay angay buhaton sa mga nagpabadlong nga dili maapektohan ang pagpanghakot sa mga pagkaon?
Dunay laing lisud sabton. Dunay lockdown karon ang Bohol. Gawas pa kini sa nosail policy nga gipatuman sa Coast Guard.
Buot ipasabot, walay makasulod sa Bohol ug walay pwede nga mobiyahe nga mga pasaheroan sa dagat paingon o pagawas sa Bohol. Ang gitugotan lang ang kargamento, dili ang pasahero.
Apan namatikdan karong bag-o nga dunay duha ka mga sakop sa kapolisan nga nakasulod sa Bohol gikan sa Cebu.
Giunsa nila kini paghimo?
Matod pa, adunay Certification/Quarantine Clearance si PNP Provincial Commander Jonathan Cabal ug tungod niini, nakahimo paglusot ang maong mga polis gikan Cebu paingon sa Bohol.
Ang unang pangutana, may katungod ba si Colonel Cabal nga mo-issue og quarantine clearance? Ikaduhang pangutana, kinsay naghatag kaniya sa maong katungod?
Ikatulo, wala ba makalapas sa executive order nga gi-issue ni Governor Art Yap ang gihimo ni Col Cabal, apil na ang duha ka mga pulis?
Ika-upat, unsa may angay buhaton sa kapitolyo human madispantahi kining maong palusot?
Kon gipalusot man gani ang maong mga polis, nganong dili na man lang pasudlon ang tanang mga taga-Bohol nga na-stranded sa mga lainlaing lugar?
Daghang nagsigi og tagawtaw batok sa gipatuman nga kwarantinas kay naghatag kini og kalisod sa panginabuhi sa mga katawhan.
Daghan ang wala moangay sa gipatuman nga pag-priso sa mga katawhan sa ilang panimalay kay dako kini og epekto sa ilang panginabuhi.
Gusto nila nga magsigi lang sila sa ilang naandan nga gipanghimo o gipangbuhat, bahala na og naay Covid-19.
Unya kon matakdan na ug maglisod na og ginhawa, mao nay kusog kaayo mopatulo sa luha, mangayo og panabang aron madala sa ospital og dako kaayo og reklamo kon dili dayon matagad.
Mao pay kusog kaayo motagawtaw sa radyo o TV nga gidaog-daog sila sa kagamhanan kay pobre sila og makaluuooy.
Susmariosep.
Angay ba nga ipadayon kining 4Ps?
Nakaayo ba kini sa mga katawhan? Natuman ba ang katuyoan niini?
Matod pa sa akong amigo, nakatapolan hinuon kini. Daghan sa mga tig-dawat sa 4Ps ang dili na ganahan motrabaho kay magsalig na lang sa ilang madawat.
Ang uban, gamiton ang ilang madawat sa sugal, inom o kaha, ipalit og shabu o uban pang ginadiling druga.
Dili ba kini usa ka dakong pag-usik-usik sa kwarta?
Duna na bay gihimong pagtuon mahitungod sa 4Ps aron pagsuta kon angay ba kining padayonon?