TAG P500 KADA ADLAW HAZARD PAY SA KAWANI SA CPA
Tanang mga kawani sa Cebu Port Authority (CPA) nga ni-report sa trabaho karon nga adunay krisis sa coronavirus disease (Covid-19), hatagan og P500 nga hazard pay matag adlaw.
Matod ni CPA general manager Leonilo Miole nga tanang gipatrabaho sa CPA, kinsa kinahanglan nga mag-field, maoy makadawat sa hazard pay.
Subay kini sa giisyu ni President Rodrigo Duterte nga Administrative Order No. 26 o ang Covid-19 Hazard Pay alang sa mga government personnel.
“The Cebu Port Authority (CPA) announced that all CPA employees who are physically reporting for work as their services are urgently necessary will each receive Covid-19 Hazard Pay at P500 per day times the number of days that they have physically reported for work during the quarantine period,” tipik sa press release sa CPA. Dugang ni Miole nga tanang kawani sa CPA lakip na kadtong anaa ubos sa contract of service o gi-outsourced nila nga gikinahanglan nga motrabaho physically, mao ang makadawat og P500 nga hazard pay matag adlaw.
Ang Covid-19 Hazard Pay agig dugang sweldo sa mga nitrabaho gihapon bisan pa man og gipaubos sa enhanced community quarantine kay duol sa risgo sa panglawas subay niining hulga sa Covid-19.
“The port is undeniably doing a very critical job during this Covid-19 pandemic. So that at the very start of the Enhanced Community Quarantine here in Cebu, with the cooperation of other government agencies, especially law enforcement agencies, and local government units, we are able to operate the ports 24/7, albeit on a skeletal workforce, thus ensuring the continued and smooth flow of inbound and outbound cargoes
in our ports,” matod ni Miole sa ilang pamahayag.
Giklaro hinuon niini nga ang Covid-19 Hazard Pay alang ra sa mga kawani o gi-outsourced nga physical nga ni-report sa ilang tagsa-tagsa ka buhatan o workstations sulod sa ilang working hours. Ubos sa AO No. 26, tanang government-owned and controlled corporations mamahimong mokuha sa hazard pay sa giaprobaban nga corporate operating budgets alang sa fiscal year 2020.
Retroactive kini o magsugod udto sa Marso 27, dihang gipaubos ang dakbayan sa Sugbo sa Enhanced Community Quarantine subay sa Executive Order No. 64 ni Cebu City Mayor Edgardo Labella.