MGA TABANOG GISAKMIT SA MGA PULIS KAY MAY ECQ
Kapin sa 40 ka mga tabanog gipatugpa sa kapulisan aron mga bata ug hamtong nga mahilig sa pagpalupad malikay sa coronavirus disease (Covid-19).
Si Major Ardioleto Cabagnot, hepe sa Dumanjug Police Station nga nahinabi sa Superbalita Cebu, nagkanayon ang mga tabanog nga ilang nasakmit gikan sa nagkadaiyang mga barangay sa lungsod, sagad iya sa mga bata.
Pero duna gihapoy mga hamtong na nga nagpalupad ilabina kadtong mga ulitawo nga dunay mga nindot nga klase sa tabanog, dunay hagong ug makadani ang desinyo ug kolor.
Matod ni Cabagnot nga sa ilang pag-roving sa kabarangayan, ilang naabtan ang mga bata, batan-on ug hamtong nga nagpalupad.
Magdinaganay kini sa pagsibat samtang ang uban gipanghikot sa punoan sa kahoy o sanga. Ila kining gipangbira, gipatugpa ug gisakmit. Kadtong dagkong mga tabanog nga dagkog tangsi ila na lang gipangputol.
Ilang mga naabtan gipahimangnoan nga di magsuroysuroy tungod sa hulga sa Covid.
Gawas pa niini, gidili ang pagsuroysuroy tungod sa enhanced community quarantine (ECQ) sa tibuok lalawigan sa Sugbo.
"Naa gyoy mga bata nga mopatulo sa ilang mga luha dihang nakunpiskar ilang nindot nga tabanog. Nakasabot ta ani nila kay nakaagi sab ta niini nga hilig. Pero simbako dili sila mapitol unya matakbuyan simbako sa Covid19, mas labaw pa sa luha ilang kasakit nga mahiaguman,"dugang ni Cabagnot.
Iyang gikaro nga kadtong mga tabanog nga naa gipalupad sa mga atop sa mga panimalay o pribadong compound, diin walay daghang tawo, wa nila sakmita. Awhag niya sa katawhan nga unahon ang ilang seguridad aron malikay sa Covid19 kay sa ilang lingawlingaw sa tabanog.