DUTERTE MILUGWAY SA ECQ SA MAYO 15
APIL TIBUOK CEBU; MGA LOCAL OFFICIAL UYON
Si Presidente Rodrigo Duterte nilugway hangtod sa Mayo 15 sa enhanced community quarantine (ECQ) alang sa National Capital Region (NCR) ug 24 ka mga lalawigan ug duha ka mga siyudad.
Apil na ang Lalawigan sa Sugbo ug Dakbayan sa Sugbo.
Ang mga mayor usab sa Dakbayan sa Lapu-Lapu ug Mandaue misunod sa mando ni Duterte.
Si Cebu City Mayor Edgardo Labella una nang nipahibawo niadtong Miyerkules, Abril 22, sa paglugway sa ECQ, gikan sa Abril 28 ngadto sa Mayo 15.
Kini human nisulbong og kalit ang mga kaso sa Covid sa dakbayan.
Unang nahimong epicenter mao ang Sityo Zapatera, Barangay Luz nga dunay labing minos 150 ka mga kaso.
Human sa Luz, nisunod usab ang Cebu City Jail, nga dunay kapin sa 100, sagad kanila mga piniriso.
Ang ikatulong dunay labing daghang mga kaso sa Covid sa siyudad ang Barangay Labangon.
Si Presidential Spokesperson Harry Roque niingon nga ang mga dapit nga ubos sa ECQ ipailawom sa re-evaluation sa Mayo 16.
Laing mga dapit ubos na sa general community quarantine (GCQ), nga maoy bag-ong normal, sugod sa Mayo 1, matod ni Roque.
Niadtong mga dapit nga ubos sa ECQ, ang Inter Agency Task Force (IATF) nirekomendar nga ang mga bata ug mga batan-on hangtod sa 20 anyos, senior citizens ug mga nag-edad og 60 anyos pataas, ug mga tawo nga dunay taas nga risgo kinahanglan magpabilin sa balay.
Sa GCQ, ang mga high school ug higher education (HEIs) mahimong tugotan nang makahuman sa school year ug ihatag ang credentials ngadto sa mga tinun-an.
Si Roque niingon nga ang IATF nirekomendar sa pagbalhin sa gahin sa cash subsidy ubos sa Social Amelioration Program ngadto sa mga residente nga ubos sa ECQ nga alang sa GCQ.
Sa GCQ ug ECQ nga mga dapit, ang mga tugpahanan ug pantalan buksan na, apan alang lang sa mga shipment nga cargo.
SUPORTA
Gisuportahan sa Dakbayan sa Mandaue ang paglugway sa ECQ sa tibuok probinsya Sugbo.
Si Atty. John Eddu Ibañez, executive secretary ni Mandaue City Mayor Jonas Cortes, nagkanayon nga suportahan sa kagamhanan sa Mandaue City ang pag-extend sa ECQ hangtod kinahanglanon.
Siya niingon nga niining panahona, kinahanglan usab nila nga mabana-bana ang ilang mga aksyon sa pagtubag sa epidemya.
Sa Dakbayan sa Mandaue, matod ni Ibañez , sila nakahukom nga himuong modified ECQ, diin sa panahon nga di na kinahanglanon kini, anam-anamon nila paglibkas.
Gikonsiderar sa mayor nga human sa epidemya. di na kini mabalik dayon sa normal.
Kon moubos na ang mga kaso sa Covid-19, ang publiko giawhag gihapon sa pag-obserbar sa preventive
measures sama sa pagsul-ob
og face mask, social distancing, paglikay sa tapok tapok, aron malikayan ang pagbalik sa virus.
Sa managlahing interbyu, giangkon ni Mandaue City Mayor Jonas Cortes nga ang Covid-19 di matapos kon way maimbento nga bakuna batok niini.
"We need to ensure our mitigating measures should be based on scientific data, dili lang mata mata," sigon ni Cortes.
Nadesisyonan ni Lapu-Lapu City Mayor Junard Chan nga lugwayan una ang ECQ sa dakbayan.
Kini human nga mipagawas og kamandoan si Duterte.
Ang ECQ sa dakbayan gikatakda untang mahuman karong Abril 28.
Sumala ni Chan nga wa nay kinutoban kun insaktong date ang paglugway niya sa ECQ sa dakbayan.
Wa pa hinuon makaluwat og executive order si Chan kalabot sa iyang nakab-ot nga desisyon. "Yes extended until further
notice," tipik sa text message ni Chan sa Superbalita Cebu.
Subling gipahinumdoman ni Chan ang mga Oponganon sa padayong pagpuyo sa tagsa-tagsa ka mga balay, hilabi na karon nga padayon ang pagsaka sa mga kaso sa dakbayan. Sagad sa mga kaso asymptomatic nga pasyente kun walay gipamati sama sa ubo, sip-on o hilanat.
Matod ni Chan bantayanan ang mga asymptomatic carrier sa virus sanglit di kini mabantayan sa publiko.
Nasuta nga kadaghanan sa mga kaso sa dakbayan natakdan pinaagi sa asymptomatic carrier
Kagahapon, Abril 24, laing 10 ka mga nagpositibo sa Covid-19 ang natala sa dakbayan, pito niini gikan sa Purok Gabi, Brgy Gun-ob, usa sa Sitio Ibabao, Brgy. Agus ug ang laing duha ang wala pa matinong lugar apan giingong na-admit sa Vicente Sotto Memorial Medical Center VSMMC.
Ang ika-10 nga kaso di lumad nga taga Lapu-Lapu City, apan natanggong sa siyudad tungod sa ECQ.