■ COVID SURVIVOR:
Malipayon ang mga staff, mga doktor sa Vicente Sotto Memorial Medical Center (VSMMC) ug mga kaila ni Elizabeth Taghoy (nag-wheelchair), 67, taga Marigondon, Dakbayan sa Lapu-Lapu sa iyang paggawas sa tambalanan sa Biyernes sa hapon, Abril 24, 2020. Siya ang labing unang pasyente sa coronavirus disease (Covid-19) nga nakagawas sa mao nga tam balanan.
Madasigong nigawas sa Vicente Sotto Memorial Medical Center (VSMMC) ang pasyente sa coronavirus disease (Covid-19), taga Dakbayan sa Lapu-Lapu kagahapon, Abril 24, 2020.
Wa kapugngi ni Elizabeth Taghoy, 67, taga Brgy. Maribago, ang pagpatulo sa iyang luha sa kalipay dihang nahinabi sa Superbalita Cebu gawas sa tambalanan diin siya gitapuk-an s mga doktor, nars ug hospital staff dayon giabibahan.
Alang niya di sayon ang iyang kasinatian sa pagbatok sa sakit hilabi na nga gi-isolate siya sa tambalanan, bungbong ra ug kisame iyang makita.
Mapasalamaton siya sa mga doktor nga miatiman kaniya, lakip na ang iyang kabanay nga wa mawad-i og paglaum sa iyang sitwasyon. Iyang giawhag ang uban nga nataptan sa Covid-19 sa padayong paglig-on sa ilang pagtuo nga sila makalingkawas sa sakit.
Labing una niyang gibuhat karon nga nag negatibo na siya sa virus, mao ang pagkigkita sa iyang bana ug anak.
Si Taghoy na-admit sa tambalanan niadtong Abril 6 human mag positibo sa Covid-19 nga iyang nakuha sa ilang katabang nga asymptomatic.
"Salamat kaayo ninyong tanan. Salamat kaayo nga naayo na ko. Mapasalamaton kaayo ko nilang tanan. Kinahanglan gyud strong feeling gyud, patience gyud. Kinahanglan dili tawon lalim," matod ni Taghoy.
Matod ni Dr. Gerardo Aquino Jr., chief of hospital sa VSMMC, si Taghoy maoy labing una nga pasyente sa Covid-19 sa tambalanan nga nakarekober sa naasoyng sakit.
Moabot sa 18 ka adlaw ang iyang pakigbatok sa sakit, sumala pa ni Aquino.
Gikonsiderar si Taghoy nga high risk nga pasyente sanglit adunay diabetes ug hypertension.
Aduna pay laing 14 ka mga pasyente ang kasamtangang na-admit sa tambalanan gumikan gihapon sa Covid-19, apan gipadayag ni Aquino pulos na kini nagpakita og senyales nga padung na makarekober.