ARCHDIOCESE NANAWAGAN OG DONASYON
Nanawagan ang Archdiocese of Cebu, pinaagi sa Commission on the Laity ug Cebu Caritas Inc., og mga donasyon alang sa mga piniriso sa Cebu City Jail (CCJ).
Kini human sa taho nga paspas ang natala nga nagpositibo sa Covid-19 sa maong prisohan ug risgo sa pagtakboy sa virus tungod sa kadaghan sa piniriso sa usa ka selda.
Matod ni Fe Barino, Chairperson sa Commission on the Laity, nagkanayon nga Vitamin C ug washable face masks ang ilang gipamarayeg sa publiko aron magamit sa mga piniriso.
Dugang niini nga adunay 6,600 ka piniriso ang CCJ Male Dormitory ug aron mapanalipdan kining mga piniriso nga wala matapti sa Covid-19, dugang ni Barono, gikinahanglan ang dinalian nga donasyon sa Vitamin C ug washable face masks.
Adunay duha ka pamaagi aron maka-donate, mahimong itunol ang face masks ug Vitamin C sa Cebu Caritas, Inc., office nga kilid sa Cebu Metropolitan Cathedral P. Gomez St., Barangay Sto. Niño sa dakbayan sa Sugbo.
Mamahimo usab nga cash donations pinaagi sa bangko ug sa GCash.
Si Barino nagkanayon nga mahimong mo-deposit sa Unionbank account sa Cebu Caritas, Inc., sa account number nga 001130006971 o sa GCash niini nga 09173216717.
Pwede usab nga mo-request ang modonar nga i-pick-up ang donasyon o tawag kang Yolly Rapana sa Commission on the Laity sa 09286265187.
Gibutyag ni Barino nga kinahanglan ang Vitaminm C nga supply sa mga piniriso sulod sa 15 ka adlaw.
Samtang 13,200 ka mga face mask diin tagduha ang inmates aron naay kapulihan.
Gawas sa mga donasyon, giplano na karon nila ni Barino ang Psychoeducation pinaagi sa teleconference alang sa mga binilanggo.
Usa ka Psychiatrist nga si Dr. Roberto ‘Bob’ Cañete maoy partner sa Commission on the Laity aron mapasabot ang mga piniriso kabahin niining kahadlok sa mga piniriso sa Covid-19.
Kahinumdoman nga agi’g protesta, natala ang kagubot sulod sa prisohan pinaagi sa pagsabasaba sa mga piniriso.
Usa ni sa gusto nga sulbaron sa Commission on the Laity.
Nakig-coordinate na sila si Barino sa warden sa CCJ nga si Jail Supt. Julius Arro diin matod ni Barino, gihangop sa warden ang maong hinabang ug plano.