Birada ni Rama

Wala hatagi og importansiya ni Cebu City Mayor Edgar Labella ang mga patutsada ni Vice Mayor Michael Rama. “Kauban man kaha ta tanan, ngano di man ta magsturya. Ngano magbuhat man mo diha sa executive nga naa may legislative. Maybe ang mayor unaware ana, insulto kana nato sa Sangguniang Panglungsod,” matod ni Rama pinaagi sa social media.

Ang mayor igo ra sa pag-ingon, “That’s his opinion,” dugang sa pag-ingon nga aduna pa siyay mas dakong atimanon ning panahon sa krisis.

Atong gihangop ang paglikay sa mayor sa kasamok, kay lagi aduna pa man siyay dakong bulohaton batok ning pagkatap sa coronavirus diseases o Covid-19.

Pero angay lang sab siguro hinuklogan sa mayor ang gipanulti ni Rama nga posibling makagiya ug makatabang unta kaniya.

Dili nato ikalimod nga pipila na ka mga higayon gihamok og kontrobersiya ang iyang mga polisiya nga mao na hinuoy nakahatag og kasamok sa mga mulopyo.

Pananglitan, kadtong nahitabo sa Carbon Public Market niadtong mahal nga adlaw nga naghuot ang mga nangumprahay bisan pa sa pagpahamtang og social distancing, ang kaguliyang sa pagpanghatag sa enhance community quarantine (ECQ) pass, vehicle pass ug ang pag-apod-apod og mga relief goods ug uban pa. Wala pa kini labot sa usab-usab niyang desisyon.

Kini maoy naghatag og timailhan nga wa hatagi og igong patuon ang mga polisiya nga gusto niyang ipasunod.

Buot ipasabot nga nagkinahanglan siya og mga tawo nga makahatag kaniya og bulawanon ug epektibong sugyot aron makab-ot ang katuyoan.

May bulok pulitika man o wala ang sugyot ni Rama apan dili kini maoy importante kon dili ang paghatag og kasulbaran sa problema.

Hatagan sab unta og tingod ang konseho sa pagpakigkombati sa Covid-19.