Hubaron aron mas sayon sabton

Taod-taod na sukad gi-implementar ang kwarantina para malikayan ang pagtakod sa Coronavirus disease labi na kay matod sa Covid-19 Information Center, sobra 2.5 milyon na ka mga tawo ang nataptan ining gamitoy apan mangtas nga kagaw nga naka-apekto sa tibuok kalibutan.

Sa pagka-karon, ang nangamatay sobra na 176 mil samtang ang mga na-ulian dul-an sa 700 mil.

Tungod sa lain-laing gipanggamit nga mga iningles nga terminolohiya mahitungod ining Corona, atong hubaron aron mas sayon sabton ang kalainan ining upat: community quarantine, enhanced community quarantine, modified community quarantine ug lockdown.

Una community quarantine (CQ). Pasabot tanan mahimo rang makagawas sa balay ug makasakay sa mga pampublikong mga sakyanan. Ang mga tindahan o tunghaan nga mga importante sama sa grocery stores, mercado nga namaligya og pagkaon abli para makabaligya og makaserbisyo. Gani, istrikto lang ang pagsulod sa mga tawo nga gikan sa laing lugar.

Sunod kining enhance community quarantine (ECQ). Limitado na ang lihok sa tanang molupyo unya duna nay pass ipanghatag. Wa na say padaganon nga mga pampublikong mga sakyanan unya serado na ang mga tunghaan, malls ug eskwelahan gawas sa mga ospital, tindahan ug importanting mga tunghaan.

Gidili na sab ang pagpundok-pundok ug pagbiyahe unya mas gi-estrikto ang pag-implimentar sa social distancing ug curfew.

Ikatulo kining modified community quarantine (MCQ). Makagawas-gawas na pero limitado ang padaganon nga pampublikong mga sakyanan. Duna na say mga check-points ipang butang. Mangabre na sa ubang mga tindahan apan dunay kondisyon nga kanunay maglagyo ang mamalitay. Serado gihapon ang mga eskwelahan unya di gihapon tugtan ang mga dagkong pundok-pundok ug ang pagbiyahe.

Katapusan ang lockdown (L). Wa nay gitugutan nga makagawas sa ilang balay. Ang kagamhanan o gobiyerno na maoy mangunay og house to house pag apod-apod sa girasyon nga pagkaon para sa mga nanga-apektuhan nga residente.