Mga tawo gusto nang motrabaho
Init nga reaction ang nisugat sa bag-ong pahibalo nga maabtan pa og tunga-tunga sa Mayo ang enhanced community quarantine kon ECQ. Una kining gipatuman sa hinapos nga bahin sa bulan sa Marso.
Ang nag-unang rason nganong magpabilin pa sa ilang pinuy-anan ang mga tawo kini tungod sa padayon nga pagsaka sa mga kaso sa coronavirus disease o Covid-19 ilabi na dinhi sa dakbayan sa Sugbo.
Gibasol ang padayon nga pagmagahi sa uban sa mga protocol nga gipatuman sama sa social distancing ug pag-gawas gawas sa panimalay bisan kong way klarong tuyo. Kanus-a man gyud mahimong gawasnon ang mga tawo gikan sa ilang pagka tanggong sa ilang mga panimalay? Ug ang mas bug-at nga pangutana mao, kanus-a makabalik og trabaho kadtong naapil sa no-work, no-pay policy?
Ang mga nag-negosyo, kanus-a man sila makapangabli og balik sa ilang mga buhatan, shop, paninda apil na ang gilibod-suroy nga mga produkto? Sa laktod kanus-a mabalik ang normal nga panginabuhi sa mga tawo? Kanus-a man gyud?
Duna koy mga nahinabi nga matawag nato mga resource persons labot sa nitibugsok nga ekonomiya resulta sa mga lockdown nga gipatuman. Ang ilang giingon mao kining pagbalansi sa epekto sa Covid-19. Sa yanong pagsabot ang dinaliang pagtagad sa mga nagkutoy nga tiyan ug ang mga gimbuhaton pagpugong sa pagkuyanap sa makamatay nga virus. Ang pangutana karon, kong ikaw ang papili-on, mamatay sa Covid-19 o sa kagutom? Way gustong mamatay sa virus ug labaw nga wa say gustong mamatay sa kagutom.
Mao nga nitumaw karon ang mga hilisgutanan nga sa mga dapit nga di apektado sa mga kaso sa Covid-19 hinayhinayon ang paglibkas sa ECQ aron makabalik na ang mga tawo sa ilang normal nga pagpanginabuhi.
Apan wa kini magpasabot nga gawasnon ka nang mogawas sa imong panimalay nga di na mag face mask. Naa gihapon ang face mask, social distancing ug pagpanghugas sa kamot. Sa ato pa ang usa ka furniture shop mobalik pagpangabli uban sa ilang mga trabahante sa kondisyon nga sundon ang naandan nga mga lagda.
Ang tag-iya sa negosyo magpas-an og bug-at nga responsabilidad pagsiguro nga di mabutang sa peligro ang iyang mga mamumuo. Kong mobalik pagpamasahèro ang mga dyip, bus ug taxi ang social distancing hugot nga ipatuman.
Mag face mask gihapon ang mga pasahero. Sa ato pa balik tang tanan sa karsada apan lahi na gyud sa naandan kay ang mga di motuman sa lagda mahimong dakpon bisan unsang orasa. Hinuon ang mga eskwelahan pabilin nga tak-opan. Kini nga mga hilisgutanan angay nga seryosohon kay kanang extension sa ECQ nga gipahibalo wa pa nay kasigurohan nga matapos sa petsa nga ilang gipahibalo.