PACQUIAO-CRAWFORD GIPLANO NA – ARUM
Nagtuo ang bantugang promoter nga si Top Rank boss Bob Arum nga ang iyang batos nga si American Terrence Crawford maoy ikasangka ni Filipino boxing legend Manny Pacquiao sa higayon nga molurang na ang pagkuyanap sa coronavirus disease (Covid-19).
Si Pacquiao, 41, wala pa nakaaway og balik human sa iyang dalaygong split decision nga kadaugan batok kang American Keith Thurman niadtong Hulyo, 2019.
Tinguha unta sa Pambansa ng Kamao ng Pilipinas nga moaway karong summer apan daw kuli pa kining mahitabo tungod sa Covid-19.
Wala pa sab nakadesisyon si Pacquiao kon kinsa ang iyang sunod nga kontrahon.
Hinuon nakigsabot na si Arum sa iyang wala'y pilde nga batos kabahin sa ilang lakang nga pagabuhaton taliwala ning kasamtangan sitwasyon.
Si Crawford, kinsa maoy tag-iya sa World Boxing Organization (WBO) welterweight
title, planong iparang ni Arum kang Errol Spence Jr., kinsa maoy tag-iya sa International Boxing Federation (IBF) ug World Boxing Council (WBC) welterweight belts sa usa ka unification bout.
Apan gumikan kay dili maayo ang relasyon ni Arum sa promoter ni Spence Jr., hayan kuli sab mahitabo kining maong engkuwentro.
Matod ni Arum nga mas dako ang poruhan nga mahitabo ang Pacquiao-Crawford
fight gumikan kay nakigsabot kaniya ang kampo sa fighting senator sa Pilipinas ning bag-uhay lang.
“Pacquiao and his people have reached out to me about the possibility of a Crawford fight,” matod ni Arum sa interbyu sa www.boxingscene.com.
Gipasabot ni Arum nga lakip sa ilang nasabutan mao ang pagpahigayon sa away sa gawas sa United States, nga usa sa nasod nga naapektuhan og grabe sa pagkuyanap sa Covid-19.
“We were hopefully thinking about scheduling that fight outside of the United States. We’ll have to see, but it is certainly a very interesting fight and once this clears up, I think we have a way where it can happen,” asoy ni Arum.
Si Arum, kinsa kanhi promoter ni Pacquiao, nibutyag hinuon nga aduna siya'y katahap nga magpanagana ang bugtong 8-division world champion sa pagpakig-away kang Crawford. Si Crawford, 32, gikonsiderar nga usa sa labing maayong pound-for-pound fighters sa
kasamtangan samtang si Pacquiao nagsikit na sa pultahan sa pagretiro.
Naggunit si Crawford og 360, 27KOs nga rekord samtang si Pacquiao, kinsa maaoy naghupot sa World Boxing Association (WBA) welterweight
crown, adunay 62-7-2, 39 KOs nga baraha.
Hinuon bisan pa niini, dili gihapon maseguro ni Crawford ang kadaugan.
Asoy ni Arum nga kon madayon ang ilang away, ang labing segurado mao ang dakong kitaon sa away.
Sa sayo pa, gipadayag nang daan ni Pacquiao nga tinguha niyang moaway pagbalik karong Hulyo ning tuiga.
Giklaro niya nga wala'y problema sa kontra gumikan kay daghan ang puwede niyang makuha nga pulos dekalidad nga mga boksidor.
Sa kasamtangan, naghuwat na lang si Pacquiao nga makontrolar na ang Covid-19 una siya mopagawas og pinal nga desisyon kon kinsa ang iyang kontrahon.