COVID HAYAN NAA NA SA PRISOHAN WA PAY LOCKDOWN
Nagtuo ang Bureau of Jail Management and Penology (BJMP) nga hayan, duna nay mga piniriso nga nangabilanggo nga nataptan na sa novel coronavirus, nagdala sa coronavirus disease (Covid-19) saw a pa sila mag-lockdown sa mga bilanggoan.
Hayan mao kini ang rason nganong usa sa mga piniriso sa Mandaue City Jail nigawas nga positibo sa Covid-19, labing unang pasyente sa pasilidad.
Tanang mga prisohan ubos sa BJMP nag-lockdown sugod niadtong Marso 14, 2020.
Sa pakighinabi sa Superbalita Cebu kang Jail Sr. Insp. Jay Ylanan, Health Service Division chief sa BJMP 7, siya niingon nga adunay posibilidad nga nakasulod na ang virus sa pasilidad sa wa pa ang lockdown ug wa pay testing kits atong higayona. "It could be nga adunay mga asymptomatic nga wala kabalo nga gidala dala lang niya. Naabot lang sa susceptible nga tawo nga nag manifest gyud nya diha nato nakita," sigon ni Ylanan.
Ang lockdown sa mga prisohan nagpasabot nga wa nay makasulod ug gawas sa maong pasilidad bisan mga kawani o dalaw.
Ang piniriso nga unang nagpositibo sa Mandaue City Jail usa ka lalaki nga nagpangidaron og 24 anyos. Napriso kini niadtong Agusto 2019.
Gi-admit na sa Vicente Sotto Memorial Medical Center (VSMMC) human kini maglisod og ginhawa ug sa pag-swab test niini, nagpositbo kini sa virus.
Niangkon si Ylanan nga bisan nag-lockdown ang mga prisohan, di gihappon malikayan ang pagpasulod og bag-ong piniriso tungod kay adunay order gikan sa korte.
Apan ibutang una kini sa ilang isolation nga silda ug sulod sa 14 ka adlaw, kon wala kini simtomas sa Covid-19, una nila isagol sa ubang piniriso.
BAG-ONG KASO
Sa laing bahin, adunay laing nagpositibo sa Mandaue City kinsa usa ka 41 anyos nga tanod.
Sigon ni manlalaban John Eddu Ibañez, executive secretary ni Mandaue City Mayor Jonas Cortes, ang maong pasyente adunay contact sa bag-o lang nga namatay sa Covid-19 sa syudad.