LAING 63 KAPINIRISO GI-COVID

NAGHATOD SA 411 KA KASO SA POSITIBO SA CEBU CITY

Ang tanang 63 ka bag-ong mga kaso sa coronavirus disease (Covid-19) sa Cebu City nga natala sa Sabado, Abril 25, 2020, gikan sa Cebu City Jail.

Matod ni Cebu City Health Officer Daisy Villa nga ang 63 ka pasyente sa Covid-19 kay puros lalake nga mga piniriso.

Tungod sa kahadlok, ang 6,604 ka mga piniriso sa CCJ nihangyo kang Cebu City Mayor Edgardo Labella nga mapailawom silang tanan sa swab test

Matod ni Villa nga ang mga lalake nga piniriso kay mao ang nabutang sa female ward tungod sa kahuot sa male dormitory.

Tungod sa bag-ong kaso nga natala, aduna nay 207 ka mga piniriso nga adunay impekyon sa Covid-19.

Ang Cebu City aduna nay 411 ka mga pasyente sa Covid-19, unom ang patay ug 16 ka laboratory-negative.

Si Villa niingon bag-ong mga kaso gikan sa 150 ka swab samples nga ilang nakuha sa mga inmates nga adunay influenza-like illness ug inmates nga kuyog og selda sa unang Covid-19 patient sa pasilidad.

Matod ni Villa nga ang mga asymptomatic o way simtomas kay nabalhin na sa bagong building sa jail facility, samtang ang naay mga mild symptoms kay nahatagan na sad og medical attention.

Sa sulod lamang sa unom ka adlaw sukad natala ang labing unang kaso sa Covid-19 sa jail

facility, nilapas na og 200 ang mga infected.

Ang unang pasyente sa Covid-19 sa jail facility kay namatay niadtong Abril 19.

Ang 41 anyos nga inmate gida sa hospital sa gabii sa Abril 18, apan namatay kini pipila ka oras sa wa pa nigawas ang positive result.

Nagtuo ang BJMP nga sa wa pa sila mag-lockdown niadtong Marso 14, 2020, duna nay nakasulod sa pasilidad nga positibo sa Covid-19. (Lahi nga estorya sa pahina 3.

HANGYO KANG MAYOR

Nangaliyupo karon ni Labella ang mga pinirso sa jail nga silang tanan mapaubos sa swab test.

Si Celia, inahan sa usa mga piniriso nga nahinabi sa Superbalita Cebu ubos sa paghangyo nga di siya nganlan, niingon nga ang iyang anak nipadangat sa iyang mensahe alang kanilang tanan sud sa jail.

Matod sa iyang anak nga nangabalaka na silang tanan sa ilang sitwasyon sa jail hinungdan nga nang-lockdown sila sa tagsa nil aka selda.

Wa nay makasulod ug makagawas sa ilang tagsa ka nahimutangan.

Si Celia nga nahinabi sa Superbalita Cebu, niingon nga ang iyang anak nga si Oscar (di tinuod nga ngan) nangahadlok na og maayo sa Covid-19.

Nisulti si Oscar kaniya nga 400 sila kapin sa 3rd floor sa male

dormitory, apan kay nagsinardinas na man, paspas ang pagpanakod sa ilang mga kauban.

Si Celia nibutyag nga si Berto, usa sa mga “mayor” sa CCJ, nihangyo kang Labella ug ubang mga opisyal nga silang tanan ipailawom sa swab test.

Kini aron masayran kinsa kanila ang positibo sa Covid-19 ug malain, sa ingon di sila matakdan tanan.

BATOK COVID

Duna silay tagsa ka mask, apan ila lang kining labhan.

Pirme sab nga malangay ang ilang rasyon sa pagkaon kay sagad sa ilang mga kusinero napositibo sa Covid-19.

Nagkulang sab ang ilang vitamins kay di mabahin nilang tanan. Mao nga nanginahanglan silang tanan sa tabang ni Labella ug ubang mga opisyal sa Siyudad.

Giestrikto na nila og maayo ni Berto ang paggawas ug sud sa matag selda.

Bisan ang mga gwardiya mahadlok na mohatod sa mga pagkaon kay basin matakdan nila.

Matod ni Celia nga nanghinaut si Berto ug kaubanan nga hatagan sila og pagtagad sa Siyudad aron silang tanan di matakdan sa sakit. /