Barangay, sityo sa Ormoc gi-lockdown
Ormoc City, Leyte – Usa ka barangay ug usa ka sitio gipa-lockdown ni Ormoc City Mayor Richard Gomez human duha ka mga tawo nakitaan og simtomas sa coronavirus disease (Covid-19).
Matod ni sa mayor, di pa hinuon kini kompirmado nga Covid-19 kay huwaton pa sa Lunes o Martes ang resulta sa confirmatory test sa swab samples nga gipadala sa Vicente Sotto Memorial Medical Center (VSMMC) sa Cebu.
Gikompirmar sa mayor nga usa sa pasyente ang opisyal sa barangay nga nag edad og 47 samtang ang usa nag edad og 66.
Ang duha naa na karon sa Ormoc City Covid-19 Isolation Facility ug gihimo ang estriktong pag monitor.
Sa paghimo ning balita, nagpadayun usab ang contact tracing sa duha ka pasyente.
Giklaro sa mayor nga pagkagabii sa Biyernes, Abril 24, nimando na siya og lockdown sa usa ka sitio sa Barangay San Pablo diin nagpuyo ang usa ka pasyente samtang gi-lockdown usab ang tibuok Barangay Boroc diin nagpuyo ang pasyente nga usa ka barangay official.
Matod sa mayor, wala lang gilockdown ang tibuok San Pablo kay naay mga national highway nga daghan ang moagi.
"Ang problema sa Boroc ang naigo is official man unya sige tuyok sa barangay. Sa initial contact tracing, daghan ang nakita nga nakaduol sa iyaha, mao nga ang tibuok barangay ato gi-lockdown," matod sa Mayor
Giproseso na usab karon ang posibleng paghatag og quarantine pass sa matag balay ning maong mga lugar.
"Dili sila pwede mogawas. If naa silay paliton, maglista lang sila and kon naa sila masugo sa gawas sa border, mao lang papaliton. Dili sab pwede mosud kay kon mosud, di na pwede pagawason" matod sa Mayor
Nagpadala na ang mayor og mga pulis sa mga entry point sa mga lugar nga gi-lockdown aron masiguro nga way makagawas sa lugar.
"I have ordered this in the event that the tests come out positive, we already have a plan in place on what to do and they will remain where they are right now, at San Pablo isolation hospital," matod sa mayor
Kon naa nay quarantine pass, usa lang sab ka tawo kada balay ang makagawas.
Si Presidente Rodrigo Duterte mianunsyo nga ang lalawigan sa Leyte diin nasakop ang Ormoc, gikonsidera nga
Low Risk Area sa Covid-19 ug gilugwayan ang general community quarantine (GCQ) hangtod Mayo 15,2020.
Apan matod ni Gomez kon ugaling mag positibo sa Covid-19 ang duha ka pasyente, posible nga iya pang i-extend ang GCQ hangtod sa katapusan sa Mayo.
"We are just doing what needs to be done. We need to be prepared for any eventuality. Mas maayo ang preparado kay sa dili," matod sa mayor.
Nanawagan ang Mayor sa katawhan sa Ormoc nga di magkompyansa, pabilin nga i-mentinar ang social distancing, mag sul-ob og facemask ug kanunay maghugas sa kamot.