22 KA PASYENTE SA COVID GIBALHIN
Ang 22 ka mga pasyente sa coronavirus disease (Covid-19) sa sityo Kalyehon ug Boracay sa Barangay Labangon, Dakbayan sa Sugbo, nabalhin na sa Labangon Elementary School.
Matod ni Labangon Barangay Captain Victor Buendia nga ila karong giseguro nga matubag ang tanang mga panginahanglanon sa mga pasyente sama sa tuig ug lawak nga ilang pundohan.
Ilang gitagan-an ang mga pasyente sa Covid-19 og 11 ka mga lawak, lima niini ang nagamit sa pagkakaron.
Sud sa 14 ka adlaw nga i-monitor ang mao nga mga tawo. Subli silang kuhaan og swab
samples paglabay sa 14 ka adlaw. Kadtong mopakita og mild nga mga simtomas sa Covid-19, ibalhin nila sa pasilidad sa quarantine nga gitagana sa Siyudad.
Duna usay shifting nga staff sa Barangay Labangon ang magbantay saisolation area.
Nagpasalamat usab si Buendia ngadto sa pagpahuwam og mga higdaanan ingon man pagbutang g nurse sa maong lugar.
"Naka PPE na sila atong staff nga mag duty atong BHW ug barangay tanod. Unya naa pud atong pulis sa gawas nga magbantay," dugang ni Buendia.
Usa sa gikaproblemahan karon sa barangay mao ang pagdugang sa tubig sa mga pasyente tungod kay di na mo-refill og tubig ang refilling stations sa mga gallon aron ibalik unta sa isolation area.
"Mangahadlok lagi sila mokuha sa maong galon kay basin daw mataptan sila," pasabot ni Buendia.
Samtang si Cebu City Councilor Dave Tumulak niingon nga ang pagkaon sa mga pasyente gisagubang na sa Dakbayan sa Sugbo.
Nakaabot na usab kang Tumulak ang problema sa barangay Labangon kalabot na sa di pag refil og tubig sa mga refilling station hinungdan nga iyang padugangan og tubig mainom ang mga pasyente.
Dugang ni Tumulak nga matag karon ug unya mag monitor lang ang mga sakop sa Cebu City Health Office.