Balik sa agrikultura

Tungod sa kataas gihapon sa risgo sa coronavirus disease (Covid-19), gilugwayan ni Presidente Rodrigo Duterte ang enhanced community quarantine (ECQ) hangtod sa Mayo 15. Naapil ang Lalawigan ug Dakbayan sa Sugbo sa mando. Si Gobernador Gwendolyn Garcia niingon nga sa di pa ang Mayo 15, iya nang paandamon ang tibuok probinsya sa Sugbo sa “bag-ong normal.” Una niyang lakang ang paglusad og mass testing aron matino kon tinuod bang way mga kaso sa Covid sa lalawigan. Mahisama nya niadto sa Cebu City nga wa una maklaro naa bay kaso tungod kay wa pa may test kits kaniadto.

Lain niyang plano mao ang pagpabalik sa agrikultura sa kalungsoran kay iyang nakita sa pagpatuman sa ECQ nga ang Sugbo nagsalig pa sa ubang mga dapit sa iyang supply sa pagkaon.

Iyang giawhag ang mga negusyante nga tabangan siya sa pagpalambo sa agri-business sa lalawigan aron dunay igong pagkaon ang Sugbo sa umaabot nga katuigan.

Tungod sa paspas nga pagtubo sa ekonomiya, sama og uhong nga nanurok ang mga building sa Sugbo. Matod sa gobernador, panahon nang tutokan ang negusyo sa agrikultura, inay mga condominium.

Di sayon ang tahas sa paghimo sa Sugbo nga dunay igong kaugalingong pagkaon pinaagi sa pagpalambo sa agrikultura tungod sa kakuwang niini og patag nga mga dapit. Daghan usab ang mga lugar nga pansil.

Apan di imposible ang panglantaw ni Garcia kon abagan sa mga negusyante kay natamnan gani ang mga disyerto sa Middle East, unsa na kaha ang Sugbo?

Kon di mahimong humay ang itanom, pulihan kini og mais nga abunda kaniadto, apan nahanaw kay kuwang og suporta ang mga mag-uuma. Duna say mga dapit nga nahimo nang mga subdivision kay gipamaligya sa mga tag-iya.

Bitaw, panahon nang seguraduhon sa Sugbo nga di magsalig sa ubang lalawigan kon pagkaon na ang hisgutan.