Kulang sa doktor
Wa koy ideya sa tibuok hulagway sa sistemang panglawas kun health system dinhi sa Syudad sa Sugbo. Apan naa kitay kasaligan nga ka-chat kabahin sa kahimtang diha sa Barrio Luz. Atong masabtan nga way doktor nga maka-ateman sa mga napositibo 24/7 tungod sa kakulang sa magahin sa Cebu City Health.
Naa may na-assign sa maong dapit apan kinahanglang i-pull out sa panahon nga gikinahanglan sab sa mga napositibo sa Bagong Buhay Rehabilitation Center (BBRC) kun ang Cebu City jail.
Hinuon, naa may barangay health worker ug barangay midwife nga maka-assist dayon labi na sa panahon nga wala ang doctor.
Nakakuha kita og ingon niini nga impormasyon tungod sab sa koordinasyon kanato sa pipila ka mga higala sa Sitio Zapatera diha sa Barrio Luz. Nag-organize man gud ang Political Officers League of the Philippines (POLPhil) og kampanya sa pagtabang sa mga residente.
Samtang nag-andam kita sa uban pang matabang sama sa pagkaon ug face shields, nakahatag na kita og mga PPE suits alang sa ilang mga community volunteers nga maoy nag-apod-apod sa mga hinabang house-to-house.
Kining maong impormasyon kabahin sa doctor nga assigned sa maong dapit nakahatag nakog ideya sa kalisod diay karon sa atong health system. Dili lang kuwestyon kabahin sa mga tambal, ekipo, testing kits, ug mga PPEs. Dakong pangutana sab kon igo ba ang atong mga doctor, nars, ug ubang mga health workers.
Mohangyo lang ko sa atong mga tigbalita nga hatagan sab og igong panahon ang pagsusi sa kahimtang sa atong health system. Di lang kita mosalig sa mga pamahayag sa mga opisyal. Duna unta say mga independente nga pagsusi.
Hinuon, magbantay kita kay nasubrahan ka sensitibo ang atong mga opisyal kon sa ilang tan-aw makadaot kanila ang pagsaway. Lalim bay dali kaayo silang nakalihok kontra ni Bambi Beltran, usa ka lokal nga tighimog pelikula ug sakop gani sa usa ka committee sa Cebu City Hall, apan daw nagguroy sa tiil kon ang ilang quarantine center sa North Reclamation Area ang hisgutan.
Imbes 10 ka adlaw mahuman na daw, niabot man og kapin sa bulan ang pagtukod niini. Marso 20 gud ang atong nabasahan nga anunsyo kabahin anang 10 ka adlaw. Kagahapon lang daw kon Abril 25 naablihan kini. Fake news diay ang 10 ka adlaw? Nganong wa prisoha ni, Mayor Edgar Labella?
Ang palusot kay di kuno basta-basta ang maong quarantine center. Kon mao man gani, nganong nanghambog man nga mahuman sulod sa 10 ka adlaw? Sa panahon sa krisis ug kinahanglan madumala ang expectations sa katawhan, mas maayong duol sa kamaturan unta ang mga anunsyo.
As we have seen and what this experience is teaching us, Cebu is not self-sufficient. Nagkinahanglan ta og bugas, nagkabuang ta og pangita ron... Adto pa ta mangita sa Mindanao o kaha maghuwat pa ta sa atong shipment, very dependent ngadtos Manila.”
- Gobernador Gwendolyn Garcia