Hápit na? Hapìt sa!
H“ apit na mahuman?” ang pangutana sa daghan kanato mahitungod sa ECQ. Kapin na baya sa usa ka buwan ug padulong na kita sa duha. Daghan na kaayo ang naapektohan. Sa milabay nga mga adlaw nanglutaw pod ang atong mga nagkadaiyang kinaiya. Naay gilaayan. Naay nakakitag lingaw. Adunay dali mopatuo. Aduna say mga badlungon. May nagbaton og kalipay sa pagbuhat sa mga butang nga dugay na nilang gilaraw. May nalipay usab kon makalusot sila sa curfew. Apan motumaw gyod ang pangutana: “Hapit na ba ni mahuman?”
Nahugno ang damgo sa duha ka mga disipulo ni Jesus mahitungod sa ilang Magtutudlo nga gipatay sa krus. Nagpalayo na sila sa Jerusalem
– simbolo sa ilang paglaum – ug nagpadulong sa usa ka lugar nga ginganlag Emmaus. Di kay hapit na sila mawad-ig paglaum. Nawad-an na gyod.
Mikalit og tumaw si Jesus sa ilang kiliran, apan wala nila siya hiilhi, ug gipangautana niya sila kon unsay ilang gipanghisgotan. Giladlad nila ang ilang gibati nga kapakyasan ug kahigwaos. Nagpadayon og paminaw si Jesus. Unya iyang gisubay ang mga gitag-an sa mga propeta mahitungod kaniya ug nga ang pagpakamatay sa krus lakip sa plano sa Dios. Nalamdagan sila. Unya, tungod kay nagkilomkilom na, giimbita nila siya sa paghapit una sa ilang panimalay. Didto gipikaspikas niya ang pan ug nahigmata sila nga siya diay si Jesucristo.
Giabi-abi nila si Jesus apan, sa
Binasi sa Mga Buhat 2:14, 2233; Salmo 16; 1 Pedro 1:17-21; Lucas 24:13-35 tinuoray, si Jesus maoy unang miabi-abi kanila. Gihatagan niya silag luna sa iyang nabanhaw nga presensya sa dihang nagpakita siya kanila. Gani sa katapusang yugto nga nagpakita si Jesus kanila, siya na ang nagpikaspikas sa pan ug dili sila. Maayo na lang nga gibawsan nila ang iyang pag-abi-abi.
Gipalapdan ni Jesus ang pag-abi-abi sa mga tumutuo. Gihatag niya kanila ang iyang Espiritu. Tungod niini nadawat nila ang gasa sa pagtuo. Diha sa Mga Buhat sa mga Apostol mibarog si Pedro ug nagwali mahitungod kang Jesus. Gani mikutlo pod siya gikan sa Karaang Kasabutan og mga nahisulat nga nagpunting kang Jesus. Susama ang iyang gihimo sa gihimo ni Jesus didto sa panaw padulong sa Emmaus. Kini diayng pag-abi-abi ni Jesus maghatag og gahum nga mahisama kita kaniya.
Apan aduna say obligasyon ang modawat sa pag-abi-abi sa Dios. Sumala pa si San Pedro, kinahanglan mataha ug motahod kita sa Dios sa atong panaw niining kinabuhia kay ang atong katubsanan dili pinaagi sa pilak ug bulawan kondili sa bililhon nga dugo ni Cristo. Makapabag-o diay kining pag-abi-abi sa Ginoo kanato.
Ang Ginoo ra gyoy nasayod kon hapit na ba mahuman ning hulga sa Covid-19. Mientras tanto, atong pahapiton ang Ginoo nga dugay nang nagmahal ug nagbantay kanato. Mokupot kita kang Jesucristo ug dili gyod kita mobuhi.
Ato na bang gipahapit ang atong Nabanhwang Ginoo sa atong kasingkasing, banay, ug kasilinganan?