Milapas sa number coding, ECQ miminos

Nagkaubos ang gidaghanon sa mga tawo nga nakalapas sa number coding nga gipatuman sa Cebu City Police Office (CCPO) ug Cebu City Transportation Office (CCTO).

Bisan ang mga nakalapas sa enhanced community quarantine (ECQ) miminos.

Sa unang adlaw sa pagpatuman sa number coding, nakadakop ang CCPO og 171 ka mga motorista. Apan niadtong, Abril 23, 30 na lang ang nadakpan. Samtang ang mga nadakpan tungod sa ECQ walo na lang.

Tungod niini, nagtuo si Cebu City Police officer-incharge Police Colonel Josefino Ligan nga daghan na ang nakasabot ug nisanong sa mando sa gobyerno.

Matod ni Ligan nga magpadayon pa ang ilang estriktong pagpatuman sa ECQ sa dakbayan sa Sugbo dungan sa bahad nga ila nang pasakaan og kaso ang mga molapas ug ibalhog sa New Cebu City Jail.

“Nagkagamay na karon ang mga violators sa ECQ ug sa number coding kay pag Thursday walo lang ka tawo ang atong nadakpan sa ECQ,” matod ni Ligan.

Si PNP Chief Police General Archie Francisco Gamboa mipagawas og kamandoan nga ipaslak sa bilanggoan ang mga malapason sa ECQ lukop nasud.

Ang deputy chief sa Regional Internal Affairs Service-7, Police Lieutenant Colonel Ruben Cuizon niingon nga mao usab ang vice chairman sa RIAS-7 Advisory Council, misuporta sa pamahayag ni Gamboa.

Matod niya nga way malapas nga balaod ang usa ka pulis nga mosikop ug mopapriso sa tawo nga milapas sa ECQ tungod kay naa sa krisis nga sitwasyon ang nasud.

Awhag niya sa mga pulis nga maoy nipatuman niini nga subayon ang nalatid sa balaod.

“Among gisuportahan ang pronouncement ni PNP Chief Gamboa kay alang ni sa kaayohan sa tanang Filipino, ilabi na karon nga naa ta sa krisis tungod sa Covid 19,” si Cuizon niingon.

Ang RIAS 7 moimbestigar sa mga pulis nga makalapas sa balaod sa Philippine National Police (PNP) ug ECQ nunot ning nagpadayon nga gubat batok sa coronavirus disease (Covid-19).