PAGSALIG LABAW SA KAHADLOK
Niadtong Enero 7, 2020, usa ka wa damha nga maayong balita ang nahibaw-an ni Amorganda “Amor” Raganas-Rago.
Pinaagi sa pregnancy test, iyang nasayran nga siya nagsabak diay.
Nagsagol ang iyang gibati nga kalipay, kabalaka, kakulba ug kahadlok.
Giangkon ni Amor nga wa malikayi nga gibati siya og kabalaka niadtong higayona tungod sa iyang panuigon nga 44 niadtong higayona.
Si Amor ug ang iyang pamilya aktibo nga nangalagad sa Santo Tomas de Villanueva Parish,
Barangay Poblacion Pardo, siyudad sa Sugbo ug hugot ang ilang pagsalig sa Ginuo.
Nangalagad usab sila sa iyang bana nga si Peter Rago sa Bukas Loob sa Diyos Catholic Charismatic Community.
Tungod sa gibati nga kabalaka ug kahadlok human mahibaw-i nga siya mabdos diay, nihunong una siya og makadiyot ug nag-ampo sa Ginuo.
“Nangadyi ko nga lamdagan ko sa Ginuo. Nag-pray ko nga tagaan ko Niya og faith ug
strength. And then naa gihatag Niya ang message nga faith
over fear,” paambit ni Amor. Matod niya, sa maong mensahe, mas naglabaw ang iyang pagsalig ug pagtuo sa Ginuo tungod kay sayod siya nga mas nasayod Kini unsay makaayo kaniya.
Niadtong Abril 15, gisaulog ni Amor ang ika-45 nga kasumaran sa iyang adlaw nga natawhan. Ang salosalo gihimo sa ilang panimalay sa Barangay Bulacao, siyudad sa Sugbo. Atol sa iyang birthday, nag
guessing activity sila kon unsa ang gender sa iyang ihimugso nga anak. Kini ang ikalimang anak nila sa iyang bana nga si Peter Rago. Karong Septiyembre 8, adlaw nga natawhan ni Mama Mary, gipaabot nga ihimugso ni Amor ang ilang kamanghuran nga anak.
Gawas sa maayo nga panglawas sa tanang miyembro sa iyang pamilya ug luwas nga pagpanganak, apil sa birthday wishes ni Amor nga mawala na ang coronavirus disease 2019 (Covid-19) sa kalibotan. / SCG