Phoenix malaumon sa bag-o nilang pangalan

Giusab sa Fuel Masters ang ilang pangalan gikan Phoenix Pulse ngadto sa Phoenix Super LPG dala ang panghinaot nga mausab sab ang dagan sa ilang kampanya sa Philippine Basketball Association (PBA) sa higayon nga molurang na ang hulga sa coronavirus disease (Covid-19).

Ang pagkahunong sa mga kombati sa 45th season sa liga nunot sa Covid-19 daw ningpabor sa habig sa Fuel Masters kon ang ilang kampanya sa liga ang hisgutan.

Sa higayon nga mobalik na sa normal ang sitwasyon, malaumon ang Fuel Masters nga malibkas na sa PBA ang indefinite suspension nga gipahamtang niini sa ilang pambatong forward nga si Calvin Abueva.

Gawas niini, malaumon sab ang Fuel Masters nga hingpit nang maalim ang nangaangol nilang mga magduduwa nga sila si Jake Pascual, Dave Marcelo ug ang tirador sa gawas nga si Matthew Wright inig balik sa aksyon sa liga.

Bisan gipatuman ang enhanced community quarantine (ECQ), ang Fuel Masters nanghatag og mga tulomanon sa tanan nilang mga magduduwa isip pagpangandam sa umaabot.

"During this crisis, we gave the players conditioning programs through group viber, lots of film clips via telegram edited defensive and offensive schemes to refresh them," matod ni coach Louie Alas nga napatik sa www.pba.ph.

Ning maong mga senaryo, malaumon ang Fuel Masters nga mahimong maayo na ang dagan sa ilang kampanya.

Sa off-season, ang Fuel Masters nanguha og mga beterano nga sila si Pascual, Brian Heruela, Jay-R Reyes, Jansen Rios ug Jaymo Eguilos aron makatabang kanila.

"We were below par in our preseason tune-up games. Most of the time, our three-four guys didn't suit up because of injuries. But we're hoping Calvin (Abueva) will play during the conference," asoy ni Alas.