MOTUTOK UNA SA OLYMPICS
Tambag ni Pacquiao ngadto kang Marcial: Abap head
Gitambagan ni Philippine boxing legend Manny Pacquiao ang dekalidad nga Pinoy amateur boxer nga si Eumir Marcial nga magtutok sa umaabot nga Tokyo Olympics una kini modawat og tanyag gikan sa professional rank.
Dili pa lang dugay, gibutyag ni Amateur Boxing Association of the Philippines (Abap) president Ricky Vargas nga adunay mga naghaylo kang Marcial aron mosaka na isip professional boxer.
Nanghinaot si Vargas nga hangup on ni Marcial ang tambag sa Pambansa ng Kamao ng Pilipinas gumikan kay alang kaniya, kaayuhan kini alang sa makonsiderar nga numero unong amateur boxer sa nasod.
"He has come out with the advise that Marcial think of the country first and stick to his Olympic dream," batbat ni Vargas kabahin kang Pacquiao nga napatik sa www.abs-cbnnews.com.
"The good senator said he can always make the jump to professional boxing after the Olympiad and he will support Marcial then," dugang ni Vargas.
Ang Olympics nakatakda untang sugdan karong Hulyo ning tuiga apan nauswag kini sa sunod tuig gumikan sa hulga sa coronavirus disease (Covid-19).
Nagkanayon si Vargas nga gikasulti niya si Marcial pinaagi sa video conference ug iyaha kining gisaaran nga andam Abap nga mosuporta kaniya aron dili kini mahikawan sa pinansyal nga panginahanglanon.
Matod ni Vargas nga nagkauyon sab sila ni Marcial nga magsabot sa personal sa higayon nga molurang na ang Covid-19.
"Eumir gave me his word that he will wait for such face-toface meeting before he makes a final decision. And I know Eumir to be a man of his word," pasabot ni Vargas.
Si Marcial naka-qualify sa Tokyo Olympics human siya nakaabot sa semi-finals sa 2020 Asia and Oceania Olympic Boxing Qualifiers sa Amman, Jordan. Wala makuntento si Marcial nga makasulod lang sa semis ning maong torneyo, misakmit pa siya og gold medal nga nagpaburot og maayo sa iyang potensyal.
Human niini, sunodsunod na ang mga tanyag nga nadawat ni Marcial gikan sa professional rank.
Giangkon ni Marcial nga makadani ang mga tanyag nga iyang nadawat hinungdan nga nakutaw ang iyang hunahuna.
Gani nangayo pa og suhestiyon si Marcial sa Pinoyng world champions nga sila si Jerwin Ancajas, Johnriel Casimero ug Donnie Nietes.
Si Ancajas uyon nga mosaka na sa professional rank si Marcial basta dili lang buhian niini ang pangandoy nga gold medal sa Olympics.
Sukad masukad, ang Pilipinas wala pa nakaangkon og gold medal sa matag upat ka mga tuig nga kompetisyon.
Sa iyang basin, si Casimero nipahimangno kang Marcial nga dili lalim ang training sa professional rank.
Samtang si Nietes, sama ni Pacquiao, mitambag kang Marcial nga magtutok lang una sa Olympics.