MAKAPALIT NA OG ALAK, IMNON SA BALAY

Mahimo nang makabaligya og ilimnong makahubog, apan padayon ang ban sa pag-inom niini sa mga pampublikong lugar sa Dakbayan sa Sugbo.

Si Mayor Edgardo Labella nilagda sa iyang Executive Order number 73, kagahapon, Abril 28, para sa pormal nga paglugway sa enhanced community quarantine (ECQ) sa Siyudad hangtod sa Mayo 15.

Ilawom sa Section 4 sa maong EO, epektibo gihapon ang liquor ban, apan ang gidili na lang niini mao ang pag-inom sa pampublikong mga lugar.

Mahimo nang makabaligya ang mga naninda og ilimnon, apan makainom lang sud sa balay o pribadong mga dapit, sama sa lawak sa hotel.

Lahi kini sa iyang unang EO niadtong Marso 16 nga apil sa pag-ban mao ang pagbaligya.

Si City Administrator Floro Casas Jr., nagkanayon nga ang EO ni Labella naglibkas sa pagdili sa pagbaligya sa ilimnong makahubog. "Ang selling unya anha mag-inum sa public place, dili na pwede. But ang selling apan adto inumon sa balay, mao nay gitugotan under the new EO," padayag ni Casas.

Ang mga mopalit og ilimnon apan anha mag-inom sa karsada, public plaza, park, basketball court, lobby sa hotel, restaurant ug ubang lugar o establisemento nga dagsaan sa publiko ginadili. Dakpon sa kapulisan uban sa pagpasaka og tukmang silot, dugang ni Casas.

Base sa EO ni Labella, ang tanang EO nga iyang giisyu padayon nga epektibo gawas sa giamendar sa liquor ban nga nahisubay sa pamahayag ni Presidente Rodrigo Duterte nga hinayhinayon og libkas ang mga gipangdili gumikan sa Covid-19.

Kini aron sa inanay makabalik pagbangon ang ekonomiya sa nasod nga kalit nihagsa gumikan sa coronavirus disease (Covid-19).